Çempionluq uğrunda amansız mübarizə aparan “Sabah”la “Qarabağ”ın düşərgəsində Novruz tətili başa çatıb.

“Bayquşlar” bu gün məşqlərə start verib. Özü də Litvada bir neçə gün dincələndən sonra Bakıya qayıdan Valdas Dambrauskasın rəhbərliyi altında. Amma “Sabah” tam heyətlə məşq edə bilmir ki, bunun da səbəbi var. Coy-Lens Mikels Ruanda, Umarali Raxmonaliyev Özbəkistan, Rəhman Daşdəmirov, Abdulla Xaybullayev, Xəyal Əliyev və Aleksey İsayev ölkəmizin əsas, Şahin İbrahimov U-21 yığmasına dəvət olunub. Düzdü, onsuz da Şahin əsas komanda ilə məşq etmirdi.

“Qarabağ” isə sabah – martın 25-də bir araya gələcək. “Köhlən atlar”ın 8 futbolçusu milli düşərgəyə yollanıb. Şahruddin Məhəmmədəliyev, Elvin Cəfərquliyev, Bədavi Hüseynov, Toral Bayramlı və Musa Qurbanlı ölkəmizin əsas, Hikmət Cəbrayılzadə U-21 yığmasına çağrılıb, Marko Yankoviç Monteneqro, Mateuş Koxalki Polşa yığmasının düşərgəsindədi.

Xatırladaq ki, çempionat aprelin 5-də bərpa olunacaq.

MÜZƏFFƏR QULUZADƏ