İsveçrədəki faciədə futbolçular da xəsarət alıb
Dünyanın ən sakit ölkələrindən olan İsveçrədə budəfəki yeni il böyük faciəyə səbəb olub.
"Football-plus.az" xəbər verir ki, yanvarın 1-də dağ xizəkçiliyi kurortu sayılan Kran-Montan şəhərində yerləşən “Le Constellation” adlı barda yeni ilə həsr olunmuş şadyanalıq faciə ilə bitib.
İlkin versiyaya görə ora toplaşan insanların çoxlu sayda benqal şamları yandırması üzündən 1-ci mərtəbənin tavanında güclü yanğın baş verib. Ora qapalı məkan olduğundan insanlar ərazini tərk etməyə çatmayıblar. Nəticədə ən azı 40 nəfər dünyasını dəyişib və 120 nəfər xəsarət alıb. Özü də insanlar o dərəcədə yanaraq kül olublar ki, indiyə qədər də onların bəzilərinin kimliyi müəyyənləşdirilməyib. Yanvarın 9-u İsveçrədə Matəm günü elan olunub.
Xəsarət alanlar arasında “Mets”in gənclərdən ibarət komandasının üzvü Tairis dos Santos da var. Onun böyük qəhrəmanlıq edərək sevdiyi xanımı xilas etdiyi, özünün isə ciddi yanıq xəsarətləri aldığı məlum olub. Bu barədə futbolçunun meneceri Kristof Yutto Fransa mətbuatına açıqlamasında xəbər verib:
“Alov başlayanda Tairis ikinci mərtəbədə idi. Böyük çətinliklə də olsa, yanğından qurtularaq özünü çölə atmağı bacardı. Sonra isə başa düşdü ki, sevgilisi hələ də içəridədi. Bu üzdən onu xilas etmək üçün yenidən ora qayıtdı. Tairis həm zərərçəkmiş, həm də qəhrəmandı”.
“Ekip” nəşrinin yazdığına inansaq, futbolçu və onun sevgilisi ciddi yanıq xəsarətləri alıblar. Tairisin bədəninin 30 faizi yanıb. Bundan başqa, gənc futbolçu güclü kəllə-beyin zədəsi alıb. Onun xanımını Belçikanın Antverpen şəhərindəki xəstəxanalardan birində əməliyyata götürüblər.
Tairis dos Santos isə hazırda Ştutqart şəhərindəki xəstəxanadadı. Bir müddət sonra onu Fransaya aparacaqlar. Menecerinin son məlumatına görə futbolçu hazırda çox ciddi ağrılar içindədi, bədəni bintlə örtülüdü. Amma yeganə sevindirici xəbər odu ki, Tairisin həyatı artıq təhlükədə deyil. “Mets” rəsmi bəyanat yayaraq futbolçuya dəstək verib.
Klubun kapitanı Qotye En isə bunları deyib:
“İndi bütün düşüncələrimiz Tairis və onun ailə üzvləri ilə bağlıdı. Səbirsizliklə onun haqda yeni xəbərləri gözləyirik. Tezliklə sağalacağına ümid edirik”.
Bu arada xəsarət alanlar arasında başqa futbolçuların olduğu da üzə çıxıb. “Lüksemburq Tayms” nəşrinin yazdığına inansaq, “Peskara”nın akademiyasında çıxış edən 17 yaşlı Eliot Telenin sağ əli yanıb. İsveçrənin aşağı liqa təmsilçisi “Lütri”nin şərəfini qoruyan 16-18 yaşlı bəzi futbolçularla isə yanğından bəri hələ də əlaqə saxlamaq mümkün olmayıb.
Digər xəbərlər
