Türkiyənin Bolu şəhərindəki məşhur ''Kartalkaya'' xizək mərkəzində yerləşən 12 mərtəbəli ''Qrand Kartal'' adlı oteldə baş verən yanğından faciəli xəbərlər gəlməkdədi.

''Football-plus.az'' xəbər verir ki, ən son məlumata görə 51 nəfər yaralanıb, 76 nəfər dünyasını dəyişib və Türkiyədə 1 günlük matəm elan olunub. Faciəvi yanğın gecə 03.30 radələrində başladığı üçün insanların çoxu yuxulu olub və bir andaca gördükləri mənzərədən şoka düşüblər. Yanğına nəyin səbəb olduğu hələ ki, bilinmir. Yanğın otelin restoranında başlayıb və daha sonra sürətlə bütün binanı ağuşuna alıb.

Dünyasını dəyişənlər arasında idman dünyasından da simalar var. Məsələn, ''Fənərbaxça''nın üzgüçülük şöbəsinin 10 yaşlı üzvü Vedia Nil Apak anası Fərda Apak ilə birlikdə həyatını itirib. Ailənin başçısı Mehmet Apak isə klubun rəsmi üzvüdü. Bundan başqa bir dönəm ''Qalatasaray''ın avarçəkmə şöbəsinin üzvü olmuş Mehmet Cem Doğan da həyat yoldaşı və iki qızı ilə birlikdə dünyasını dəyişib. Futbol dünyası isə Nedim Türkməni itirib. 58 yaşlı Türkmən 2009-cu ildə ''Orduspor''un prezidenti seçilmiş və 2022-yə qədər bu vəzifəni icra etmişdi. O, 2011-də ''Orduspor''u 26 illik fasilədən sonra elitaya yüksəltmişdi. Həmin dönəmdə ''Orduspor''da hətta ''Valensiya''nı 2000-ci ildə Çempionlar Liqasının finalına daşımış Ektor Kuper də çalışmışdı.

Nedim Türkmən də ailəsi - həyat yoldaşı, bir oğlu və bir qızı ilə birlikdə dünyasını dəyişib.

ƏLİ