Kriştiano Ronaldo “Santyaqo Bernabeu”da vida matçı keçirə bilər.

"Football-plus.az" xəbər verir ki, bu barədə “Defansa Central” nəşri məlumat yayıb.

“Əl-Nəssr”in və Potuqaliya yığmasının 40 yaşlı hücumçusu peşəkar karyerasını başa vurandan sonra vida matçında iştirak etmək üçün Madridə qayıda bilər. Hazırda bu məsələ ilə bağlı konkret razılaşmalar yoxdu. Lakin tarixin ən böyük futbolçularından biri ilə vida mərasimini təşkil etmək üçün maraqlı tərəflər arasında mümkün tədbirin formatları artıq müzakirə olunur.

Variantlardan biri Madriddə “Real” ilə “Əl-Nəssr” arasında yoldaşlıq oyununun təşkilidi. Bu ssenaridə Ronaldo hər komandada bir hissə oynaya bilər. Oxşar formatdan Raul Qonsalesin vida matçında da istifadə olunmuşdu.

Həmçinin “Sportinq”lə bağlı alternativ bir ideya da nəzərdən keçirilir. Bu halda, Kriştiano peşəkar karyerasına başladığı klubda və futbolçu karyerasının ən uğurlu mərhələsini keçirdiyi “Real”da oynamaq imkanı əldə edəcək.

Kriştiano 2002-03-cü illərdə “Sportinq”in, 2003-09-cu və 2021-22-ci illərdə “Mançester Yunayted”in, 2009-18-ci illərdə “Real”ın, 2018-21-ci illərdə isə “Yuventus”un formasını geyib. Onun “Əl-Nəssr”lə 2022-ci ilin dekabrında müqavilə imzaladığını da xatırladaq.