FİFA gələn il ABŞ, Kanada və Meksikada keçiriləcək dünya çempionatının mükafat fondunu açıqlayıb.

"Football-plus.az" xəbər verir ki, DÇ-2026-nın qalibi tarixə rekord məbləğdə qazancla düşəcək.

Nəhəng turnirin qalibi olacaq yığma üçün 50 milyon dollar mükafat müəyyənləşdirilib. Bu isə mundiallar tarixində çempiona veriləcək ən yüksək məbləğdi. Məlumata görə, ümumilikdə 655 milyon dollar mükafat fondu təyin olunub. Qrup mərhələsində mübarizəni dayandıran komandaların 9 milyon dollar, finala yüksələn yığmaların isə nəticədən asılı olaraq 33 milyon dollara qədər qazanması nəzərdə tutulub.

Xatırladaq ki, 2022-ci ildə Qətərdə keçirilən dünya çempionatının qalibi olan Argentina yığması 42 milyon dollar mükafat almışdı. Fransa isə Rusiyada təşkil olunan DÇ-2018-də çempionluğa görə 38 milyon dollar qazanmışdı.