Bu mövsüm oynadığı 18 rəsmi matçın 16-da qol buraxan və qapıda problemlər yaşayan ''Beşiktaş''da ciddi şəkildə yeni qapıçı axtarışları başlayıb.

"Football-plus.az" xəbər verir ki, İstanbul nəhəngi qışda hökmən qapıçı transfer etmək niyyətindədi.

İspaniyanın ''Sport'' nəşrinin iddiasına görə ''ağ-qaralar'' ''Barselona''lı Mark-Andre Ter Ştegenə maraq göstərirlər. ''Qartal'' təcrübəli qapıçını mövsümün sonuna qədər icarəyə götürmək istəyir. Müqaviləyə məcburi olmayan 8 milyon avroluq daimi transfer maddəsi də salına bilər. ''Beşiktaş'' ikinci dövrə üçün Ter Stegenin maaşını ödəməyə razıdı. ''Barsa'' rəhbərliyi qərarı qapıçının öz öhdəliyinə buraxıb. ''Qartal''ın adından danışıqlarda klubun idman direktoru və baş skautu almaniyalı Eduard Qraf iştirak edir. O həmyerlisini Türkiyədə oynamağa razı salmaq üçün dəridən-qabıqdan çıxır.

Ter Stegenə daimi olaraq əsas heyətdə oynayacağı ilə bağlı söz verilib. 33 yaşlı qapıçı hələ ki, bütün diqqətini ''Barsa''ya yönəldib. Ötən mövsüm ağır zədə aldıqdan sonra gözdən düşən və əsas qapıçı statusunu itirən almaniyalı ilk növbədə formasını bərpa etmək və klubdakı gələcəyini dəqiqləşdirmək niyyətindədi.

O, bu mövsüm heç bir rəsmi oyuna çıxmayıb. ''Barsa''da 12-ci mövsümünü keçirən Ter Stegen ümumilikdə bu klubda forma geydiyi 422-i oyunun 175-də qapısını toxunulmaz saxlayıb və 416 qol buraxıb.