DÇ-2026-nın seçmə mərhələsi başa çatdı. Qrupu 2-ci pillədə başa vuranları, eləcə də Millətlər Liqasındakı qrup liderlərini pley-off matçları gözləyir.

"Football-plus.az" xəbər verir ki, 16 komanda 4 səbətə bölünüb və noyabrın 20-də İsveçrənin Sürix şəhərində püşkatma mərasimi keçiriləcək.
Bizi belə desək, 4 ayrı-ayrı "final four" gözləyir. 16 komanda 4 ayrı qrupa bölünəcək. Bu qruplarda 1-ci səbətdəki komandalar 4-cü, 2-ci səbətdəki komandalar isə 3-cü səbətdəkilər ilə qarşılaşacaq. Gələn il martın 26-da yarımfinallar, martın 31-də finallar keçiriləcək. Həm yarımfinal, həm də finalda qalib bir oyunla müəyyənləşəcək. Qaliblər DÇ-yə vəsiqə qazanacaq. Yarımfinallarda "səpələnmişlər", yəni 1 və 2-ci torbada olan komandalar evdə oynayacaq.
Türkiyə 1-ci səbətdə yer aldığına görə yarımfinal matçını doğma azarkeşləri önündə keçirəcək. Final matçının ev sahibi isə püşkatmadan sonra bilinəcək. Qeyd edək ki, Türkiyə İtaliya, Ukrayna və Danimarka ilə birgə 1-ci səbətdə yer alır. Yəni ''ay-ulduzlular''ın bu rəqiblərlə qarşılaşmayacağı dəqiqdi. 4-cü səbətdə isə İsveç, Rumıniya, Şimali Makedoniya və Şimali İrlandiya yer alır. Yəni Türkiyənin yarımfinaldakı rəqibi bu 4 komandadan biri olacaq. 2 və 3-cü səbətlərdə, yəni finalda Türkiyə ilə qarşılaşmaq ehtimalı olan komandalar isə bunlardı: Uels, Polşa, Çexiya, Slovakiya, Albaniya, İrlandiya, Kosovo, Bosniya və Hersoqovina.
Maraqlıdı ki, Çexiya yığmasının "sükanı arxasına" keçməyə əsas namizədlərdən biri Fatih Terimdi. Bu təyinat baş tutsa, Terimin finalda Türkiyəyə rəqib olmaq ehtimalı yaranacaq.