Sabah (Bakı) – Zirə 3:0 (2:0)
92. Stas Pokatilov (k) – 6,0
27. Timoteuş Puxaç – 6,0
5. Rəhman Daşdəmirov – 5,5
3. Stiv Solvet – 6.0
80. Akim Zedadka – 6,0
(2. Amin Seydiyev, 82) – qiymətsiz
33. Umarali Raxmonaliyev – 6,5
(6. Abdulax Xaybulayev, 82) – qiymətsiz
13. İvan Lepinitsa – 5,5
19. Aron Maluda – 7,0
(10. Anatoli Nuriyev, 82) – qiymətsiz
21. Velko Simiç – 7,5
11. Kahim Parris – 6,0
(70. Cesse Sekidika, 76) – 5,0
88. Xəyal Əliyev – 6,5
(8. Ayaz Quliyev, 86) – qiymətsiz
Ehtiyat oyunçular
55. Nicat Mehbalıyev
72. Rustam Samiqullin
17. Tellur Mütəllimov
40. İqor Noqeyra
53. Andrey Santos
Baş məşqçi: Valdas Dambrauskas
Komandanın ən yaxşısı: Velko Simiç

97. Tyaqo Silva – 5,5
25. Enrike Kustodio – 5,0
4. Ruan Renato – 5,0
26. Stefan Aka – 5,0
32. Qismət Alıyev (k) – 6,0
(14. Elçin Əlicanov, 77) – qiymətsiz
21. Hacıağa Hacılı – 5,0
(6. Eldar Quliyev, 46) – 5,0
93. Brahim Konate – 5,5
(7. Rövlan Muradov, 72) – 5,0
11. Junior Martins -5,0
10. Giorgi Papunaşvili – 5,0
70. Namik Ələskərov – 5,0
(30. Rikardo Martins, 46) -5,0
77. Yeqor Boqomolski – 5,0
(28. Leroy Mikels, 61) – 5,0
Ehtiyat oyunçular
13. Aydın Bayramov
41. Anar Nəzirov
16. Fuad Bayramov
48. Ramiz Muradov
43. Əhliman Süleymanzadə
5. Ange Mutsinzi
Baş məşqçi: Rəşad Sadıqov
Komandanın ən yaxşısı: Qismət Alıyev

Qollar: A.Maluda, 42 (1:0, U.Raxmonaliyev). V.Simiç, 45+2 (2:0, X.Əliyev). V.Simiç, 75 (3:0, A.Maluda).
Vərəqələr: J.Martins, 10 (qeyri-idman hərəkəti). A.Maluda, 15 (qeyri-idman hərəkəti). C.Sekidika, 90 (qeyri-idman hərəkəti) – sarı.
Hakimlər: CAVİC CƏLİLOV, Kamran Bayramov, Müslüm Əliyev, Emin Əliyev (hamısı Bakı).
VAR hakimi: Rauf Cabbarov (Bakı).
VAR hakiminin köməkçisi: Eyyub İbrahimov (Bakı).
Hakim-inspektor: İmanxan Sultani (Bakı).
AFFA nümayəndəsi: Eldəniz Musayev (Bakı).
19 oktyabr. Bakı. “Bank Respublika Arena”. 971 tamaşaçı (8600 yerlik).
Hər hissəyə 3 dəqiqə əlavə olunub.
Oyunun qiyməti: 6,5.

Söhbət paytaxt derbisindən, hələ onu demirik ki, avrokuboklara vəsiqə qazanmaq uğrunda mübarizə aparan komandaların duelindən gedirsə, gərginliyin son həddə çatacağını, hər mövqe, hər top üçün “qanın su yerinə axacağını” proqnozlaşdırmaqdan daha təbii nə ola bilər? Biz də Masazıra məhz bu düşüncələrlə yollanmışdıq. Ancaq axtardığımızı nə tribunalarda tapdıq, nə də meydanda. Yox-yox, məqsəd “Sabah”ın layiqli qələbəsinə kölgə salmaq deyil. İnsafən, “bayquşlar”ın hər iki hissədə inamlı oyun göstərdiyini və haqq etdiyi 3 xalı qazandığını bildirməliyik. Ancaq “Zirə” heç özünə oxşamadı. Rəşad Sadıqovun komandası əlisilahlı adamın qarşısına qılıncla çıxan döyüşçünü xatırlatdı.

Masazır təmsilçisi hələ 3-cü dəqiqədə Silvanı əllərini işə salmağa məcbur etdi. Portuqaliyalı Zedadkanın zərbəsini zərərsizləşdirməklə hesabın erkən açılmasına imkan vermədi. Qolkiper təhlükəni yenicə sovuşdurmuşdu ki, Xəyal qeyri-dəqiqlik üzündən komandasını üzdü. Növbəti hücumun müəllifi də “Sabah” oldu. Bu dəfə Parris fürsəti dəyərləndirə bilmədi: 24-cü dəqiqədə cərimə zərbəsini yerinə yetirən yamaykalı təxminən 20 metrdən tiri “nişan aldı”. Uzun müddət sakit məcrada davam edən matçda 42-ci dəqiqədə qol səsi eşidildi. Dəqiq desək, Lepinitsanın ötürməsini qəbul edən Umarali cərimə meydançasındakı Maludanı vaxtında gördü ki, sonuncu qüvvətli zərbəylə topu tora qovuşdurdu. Fərqi artırmaq üçün “Sabah”a çox vaxt lazım olmadı. Növbəti hücumu 45+2-ci dəqiqədə reallaşdırmağa müvəffəq olan “bayquşlar” Xəyalın ötürməsi, Simiçin başla zərbəsi sayəsində fasiləyə üstün yollandı.

İkinci yarının əvvəli “Zirə”nin bir sıra cəhdləriylə yadda qaldı. Qonaqların uduzmaq istəmədiyi görünürdüsə, həlledici məqamlarda yol verilən səhvlər onları tezliklə ruhdan saldı. “Qartallar” əvvəl Qismətin, ardından Papunaşvili və Konatenin uğursuz cəhdləri üzündən məyus oldu. Belədə “Sabah”ın hesabı darmadağın həddinə çatdırmasına şahidlik etdik. 75-ci dəqiqədə Simiç Maludanın uzaqdan göndərdiyi topu qəbul edər-etməz “çərçivə”ni nişan aldı. Bir qədər sonra Rövlanın növbəti cəhdi fayda vermədisə, 81-ci dəqiqədə Maluda dubl etmək imkanını qaçırdı. “Zirə”nin oyun ərzində ən təhlükəli hücumu 87-ci dəqiqədə qeydə alındı. Burda Rövlan fərqlənməyə yaxın idi ki, Pokatilov həlledici qurtarışla komandasının köməyinə çatdı.
Beləliklə, “Sabah” parlaq qələbəylə 4-cü pilləyə yüksəldi. “Zirə” isə adəti üzrə “payız sindrom”una yaxalanmağa yaxındı. Qələbə həsrtəti 3 matça çatan qəsəbə təmsilçisi ən qısa vaxtda toparlanmasa, hədəfindən uzaq düşəcək.

Gözdən qaçmadı
// “Soldati di Sabah” və “Qartallar” fanklubları tribunada idi. “Zirə” meydanda nə qədər sönük idisə, azarkeşləri də tribunada bir o qədər həvəssiz görünürdü.
// Rəşad Sadıqov fasilədə hakimin qərarına etiraz etdiyinə görə sarı vərəqə aldı.
// “Sabah”ın futbolçuları qolları zədəli Pavoş Şafrankoya həsr etdi.

KƏNAN BAHADIR