Azərbaycan futbolunda hakimlikdən narazılıqlar son həddə çatıb. Özü də hələ mövsümün qızğın çağına qədəm qoymamışıq, həlledici qarşılaşmalar başlamayıb.

Nə zaman ki mükafatçıların sırası müəyyənləşməyə başlayacaq, uğursuzluqla üzləşənlər avrokuboklara vəsiqədən məhrum olacaqlar, onda ağız deyəni qulaq heç eşitməyəcək. Hakim səhvləri həm də bir qrup işbaza, üzərinə düşənin öhdəsindən gələ bilməyən məşqçilərə bəhanə vermiş olacaq. Belələri hakimlərin bilərəkdən və yaxud da bilməyərəkdən buraxdığı səhvlərin arxasına sığınacaq, uğursuzluqlarını bu səhvlərlə ört-basdır etməyə başlayacaqlar. Bu məqama yazımın davamında da toxunacam.

“Zirə” ilə oyundan sonra “Neftçi” tərəfinin eitrazları qulaq batırırdı. Paytaxt təmsilçisi hələ “Sabah”la qarşılaşmadakı hakim idarəçiliyindən narazı qalmışdı. Etiraza da səbəb “Sabah”ın qapısına penaltinin təyin olunmaması idi. Həmin qarşılaşmada meydandakı söz sahibi İnqilab Məmmədova VAR-da oturan Kamal Umudlu ilə Vüsal Məmmədov yardımçı olmalı, ədalətin qorunmasına kömək göstərməyə çalışmalıydılar. VAR-da oturanlar İnqilab Məmmədovu da monitora baxmağa çağırdılar və mübahisəli epizodda “Sabah”ın qapısına penalti təyin olunmadı. 7-ci turun “Zirə” – “Neftçi” qarşılaşmasında isə Kamal Umudlu özü baş hakim kimi söz sahibi idi. Ona VAR otağında Rəşad Əhmədov kömək göstərməliydi.

Göstərdilər, özü də necə. Oyunun son saniyələrində “Neftçi”nin qapısına təyin olunan penalti Samir Abasovla ona qahmar çıxanların çörəyinə əməlli-başlı yağ sürtdü. VAR görüntülərindən nəyin baş verdiyini anlamaq, hakimlərin nəyə əsasən penalti təyin etdiyini başa düşmək mümkün olmadı.
2:2 hesabıyla bitən oyunun nəticəsi qaldı bir yanda. Hamı həmin penaltini müzakirə etməyə başladı. Beləcə “Neftçi”nin də uğursuz oyunu gündəmdən düşdü. Belə bir görüntü yaradıldı ki, “Neftçi” dirçəlməyə, qələbə qazanmağa başladığını anda hakimlər dövriyyəyə girir, onun qələbəsini əngəlləyirlər. Amma bu məntiq “Araz Naxçıvan”la oyunda tərsinə işləməli oldu. Çünki “Neftçi” doğma meydanda keçirilən qarşılaşmada hesabı açan tərəf olsa da, məğlub duruma düşmüşdü.

İkinci hissə başlayan kimi VAR-ın işləmədiyi barədə məlumat gəldi. Sonra da gah VAR-ın işlədiyini dedilər, gah da işləmədiyini. Əsl həngamə də bundan sonra baş verdi. 55-ci dəqiqədə Emin Mahmudovun başına toxunan top tora qovuşdu və dərhal da baş hakim Fərid Hacıyev oyundankənar vəziyyətə işarə verdi.

Qəribədi ki, “işləməyən” VAR hakimin qulağına nəsə pıçıldadı, Hacıyev də bir müddət VAR-da oturan Nicat İsmayıllı ilə müzakirə apardı. Məlum oldu ki, Emin Mahmudov topa başla toxunanda oyundankənar vəziyyətdə deyilmiş. Qalan 40 dəqiqəyə yaxın müddət ərzində VAR-ı sazlamaq, ofsayd xətti çəkib şübhələrə son qoymaq mümkün olmadı. Necə ki, “Zirə” ilə oyundakı penaltinin nə üçün təyin olunmasıyla bağlı normal görüntü görə bilməmişdik, “Neftçi”nin “Araz Naxçıvan”ın qapısına vurduğu ikinci qol zamanı da ofsaydın olub-olmaması hər kəsə qaranlıq qaldı.

Gözlənildiyi kimi, Samir bəy də “Araz Naxçıvan”la oyundan sonra VAR-ı yada salmayıb. Çünki bu dəfə VAR-ın varlığı ilə yoxluğunun bilinməməsi onun komandasının xeyrinə olub. Hər şey bir yana, hakimlərimiz də, onlara rəhbərlik edənlər də yaxşı-yaxşı düşünməlidilər. Narazılıqlar arta-arta gedir. “Qəbələ”nin də ortaya qoyduğu görüntülər Azərbaycanda VAR-ın hakimlərin özlərinə sərf edən şəkildə işlədiyini göstərir. Gəl indi inanma ki, kimlərsə hakimlərə sifariş verir.

Meydandakı hakimin hansısa səhvinə bəhanə tapmaq olar, deyərsən ki, insandı. Amma VAR monitorunun arxasında oturanın, epizodları incələmək imkanı olanın bəraəti yoxdu. Odu ki, ədalətli və ciddi olmağın zamanı çatıb. Özünüzü və VAR-ınızı gülünc vəziyyətə salmayın.