Yığmanın DÇ-2026-nın seçmə mərhələsi çərçivəsində Fransa ilə oyunu arxada qaldı. Ancaq sürəti azaltmaq olmaz. Ona görə ki, qarşıda hələ Ukrayna ilə matç var. Tərslikdən həmin görüş də səfərdədi. Bu o deməkdi ki, Parisdə çətin sınaqla üz-üzə qalan komandamız, demək olar ki, fasilə vermədən növbəti qarşılaşmaya köklənməlidi.

Qısası, yığmamızı indi də Polşanın Vrotslav şəhərinə səfər gözləyir. Etiraf edək ki, bu dəfə o qədər də narahat deyilik. Hər halda, Ukrayna millisi bizim üçün keçilməz sədd deyil. Ancaq yenə də ehtiyatlı olmalıyıq. Axı sentyabrın 9-da Tofiq Bəhramov adına Respublika stadionunda bu rəqibin əsəbləriylə oynamışıq (1:1). Bəs, bu dəfə necə olacaq? Bunu öyrənmək üçün gözünüz “CBC Sport”un canlı efirində olsun.

DÇ-2026-nın seçmə oyunu
Ukrayna – Azərbaycan 2:1
Aleksey Qutsulyak, 30. Ruslan Malinovski, 64 - Vitali Mikolenko-öz qapısına, 45+3
13 oktyabr. Krakov, “Krakoviya” stadionu. Saat 22.45.

Əvvəlcə “Ukraynaya qarşı səfər matçı hara, Polşanın Vrotslav şəhərində oynamaq hara”, - deyə düşünənlərə xatırladaq ki, Rusiya ilə bu ölkə arasındakı amansız müharibə davam edir. Rusiya 2022-ci ilin fevralından bəri Ukrayna ərazisini işğal etmək üçün qanlı bir müharibəyə başlayıb, bitirmək niyyəti də yoxdu. Odu ki, Ukrayna millisi həmin vaxtdan bəri ev oyunlarını başqa ölkələrdə keçirir. Maraq üçün bildirək ki, “Tarçinski Arena” 45 min yerlidi. Ancaq ukraynalıların bu arenada anşlaq yaradıb-yaratmayacağını proqnozlaşdırmaq çətindi. O başqa məsələ ki, bu gün tribunalara yox, məhz yaşıl meydanda yaşanacağı gözlənilən hadisələrə köklənməliyik. Burda ən vacib məqam Ukrayna millisinin Bakıdakı matçda xal itirməsidi. Belədə nominal meydan sahiblərinin qisas almaq eşqiylə döyüşəcəyinə şübhə yoxdu. Bəs bunun üçün yetərli qüvvəyə malikdilərmi? Daha əvvəl baş məşqçi Sergey Rabrovun Azərbaycan və İslandiya ilə oyun üçün 25 futbolçuya dəvət göndərdiyini xəbər vermişdik. İş ondadı ki, Kiyev “Dinamo”sunun müdafiəçisi Aleksandr Tımçik, İspaniya “Jirona”sının yarımmüdafiəçisi Viktor Sıqankov və Türkiyə “Trabzonspor”unun yarımmüdafiəçisi Aleksandr Zubkov zədəli olduğu üçün bu matçı buraxacaq. Onu da nəzərə alaq ki, “sarı-göylər” dünən DÇ-nin seçmə oyununda İslandiya ilə qarşılaşıb. Deməli, millimiz kimi, rəqibdə də yorğunluq hiss olunacaq. Bizə qalan isə bu məqamları öz xeyrimizə çevirməkdi.

Öz aramızdı, bu, yığmamızın özünü sübut etmək, gücünü ortaya qoymaq üçün növbəti şansıdı. Bəlkə də Fransa ilə matçda qeydə alınan məğlubiyyəti bağışlamaq asandı. Lakin Ukraynayla oyunda, heç olmasa, bir xal qazanmaq vacibdi ki, millinin gələcəyinə bəslənən ümidlər diri qalsın. Əlbəttə, belədə baş məşqçi Ayxan Abbasovun çiyinləri üzərindəki məsuliyyətdə birəbeş artır. Bəli, AFFA hələ mütəxəssislə imzalanan müqavilənin müddətini açıqlamayıb. Ancaq ardıcıl uğursuzluqların həmin müddətə istənilən halda mənfi təsir edəcəyinə şübhə yoxdu. Nəticədə yerli məşqçi dəstəkçilərinin də dili qısala bilər ki, Ayxan bəy buna imkan verməməlidi, Odu ki, oktyabrın 13-də azı uduzmamaq üçün qan-tər içində qalmaq, sona qədər döyüşmək vaxtıdı. Ən əsası qələbə uğrunda! Axı üç xal qazana bilməsək, millimizin qələbə həsrəti nə az, nə çox - 13 oyuna çatacaq!

KƏNAN BAHADIR