“Qalatasaray” bunu tarixində ilk dəfə bacardı - İCMAL
“Qalatasaray” turun açılış oyununda “Alanyaspor”un qonağı oldu.
"Football-plus.az" xəbər verir ki, bu mövsüm artıq “Fənərbaxça” (2:2) və “Beşiktaş”dan (2:0) xallar qoparan, eləcə də bu matçda qədər evdə 6 oyunluq məğlubiyyətsiz seriyaya malik olan “Alanyaspor” son çempiona da çətin anlar yaşatdı. Amma Joao Pereyranın komandası çox şanssız bir oyun keçirdi və heç cür sürpriz edə bilmədi.
İkardinin ilk yarının ortalarında Sinqonun ötürməsindən sonra dabanla vurduğu baxımlı qol sona qədər oyunda yeganə oldu. Halbuki meydan sahibləri ən azı 1 xala artıqlamasıyla layiq idilər. Təkcə bir faktı vurğulayaq ki, Uğurcan Çakır oyunu 8 seyvlə tamamlayaraq çempionatdakı şəxsi rekordunu təkrarladı. “Opta”nın açıqladığı rəqəmə görə “Alanyaspor” bu matçda 6 (!) yüzfaizlik qol şansını boşa verib. Matçı izləyənlər arasında “sarı-qırmızılar”ın əfsanəsi George Haci də var idi. Onun oğlu Yanis ikinci hissədə meydan sahiblərinin heyətində oyuna qoşuldu.
Yeri gəlmişkən, İkardi “Qalatasaray”da 66-cı qolunu vurdu və indi onu Hacinin rekordunu təkrarlamaqdan cəmi 6 qol ayırır. Beləliklə, Okan Burukun komandası 7-ci həftəni də maksimum nəticə ilə başa vurdu. Onu da bildirək ki, “Cim-Bom” superliqada ardıcıl 32-ci qarşılaşmada qol vurmaqla turnirin yeni rekordunu müəyyənləşdirdi!
Şənbə gününün oyunları da meydan sahibləri üçün uğurlu alınmadı. “Qaziantep” bütün 2-ci hissəni azlıqda keçirən “Samsunspor”la oyunda iki topluq geriliyi aradan qaldırsa da, 3 xal qazana bilmədi. Tura ikinci pillədə daxil olan “Göztəpə” “Eyüpspor” səfərində qolsuz bərabərliklə kifayətlənməli oldu. İzmir təmsilçisi hələ ki bu mövsüm uduzmayan 3 klubdan biridi. “Trabzonspor” “Atatürk Olimpiya”da debütant “Fatih Karagümrük”lə matçda 4:1 öndə olmasına baxmayaraq, az qala xal itirəcəkdi.
Matçın son anlarında meydan sahiblərinin forvardı Fofana 53 saniyə aralığında iki qol vurdu. XXI əsrdə Türkiyə çempionatında 53 saniyəyə iki qol vuran futbolçu olmamışdı! Ancaq onun qolları xal qazanmaq üçün kifayət etmədi. “Karagümrük” cəbhəsi bu matçdakı hakimlikdən kəskin narazı qaldı. Xüsusilə ilk yarının sonlarında qonaqların xeyrinə verilən penalti böyük söz-söhbətə səbəb oldu. Hətta trabzonluların baş məşqçisi Fatih Təkkə də o epizodda penalti olmadığını etiraf etdi.
Bazar günü “İstanbul BŞ” Konyadan xalsız ayrılmaqla Nuri Şahinin başçılığı altında ilk dəfə məğlub oldu. “Kasımpaşa” son saniyə qolu ilə Rizədə hesabına 3 xal yazdısa, “Gənclərbirliyi” əksinə, son saniyələrdə buraxdığı qolla Kayseridə qələbəni əldən verdi. Amma “Gənclər”in son 20 dəqiqəni 9 futbolçu ilə keçirdiyini bildirək. Son 3 rəsmi oyunda qələbəyə həsrət qalan “Fənərbaxça” bu dəfə Əmrə Belözoğlunun çalışdırdığı “Antalyaspor”u qəbul etdi. Qonaqlar ilk yarıda pis təsir bağışlamasalar da, ələ düşən fürsətləri dəyərləndirə bilmədilər. “Fənər” isə fasilədən sonra özünə lazım olan qolları vura bildi.
Maraqlıdı ki. 2-ci hissənin ortalarında Neneyə qarşı kobudluqdan sonra qazanılan penalti zamanı topun başına yenə Talişka keçdi. Halbuki “sambaçı” bu mövsüm artıq “Göztəpə” (0:0) və “Alanyaspor” (2:2) ilə oyunlarda iki önəmli penaltini boşa verərək komandasına qənim kəsilmişdi. Böyük uğultu və fit sədaları altında topa yaxınlaşan ulduz futbolçu bu dəfə səhvə yol vermədi. Yekun nəticəni isə oyunun son anlarında Şimanski müəyyənləşdirdi. “Antalyaspor”u ardıcıl 7-ci superliqa matçında məğlub edən “Fənər” xalını 15-ə çatdırmaqla 2-ci pilləni yenidən özünə qaytardı.
Onu da bildirək ki, “Fənər” cəmi 3 həftə öncə Tedeskonun köməkçisi kimi kluba dəvət edilən Gökhan Gönüllə yolları ayırdı!
7-ci tur
Alanyaspor – Qalatasaray 0:1
İkardi, 23.
Qalatasaray: Uğurcan Çakır, Sinqo, Sançes, Əbdülkərim Bardakcı (Yakobs, 63), Ərən Elmalı, Torreyra (Lemina, 46), Sara (İlkay Gündoğan, 63), Şallai, Sane (Metehan Baltacı, 77), Barış Alpər Yılmaz (Osimhen, 85), İkardi.
Fənərbaxça – Antalyaspor 2:0
Talişka, 65-p. Şimanski, 90+2.
Fənərbaxça: Ederson, Semedo, Şkrinyar, Oostervolde, Braun, Asensio, İsmayıl Yüksək (Fred, 87), Nene (Oğuz Aydın, 90+1), Talişka (Şimanski, 87), Kərəm Aktürkoğlu (İrfan Can Kahveci, 77), Ən-Nəsiri (Cenk Tosun, 77).
Beşiktaş – Kocaelispor 3:1
Rafa Silva, 4. Çernı, 10. Sirota, 90+3-öz qapısına – Bingöl, 50.
Fatih Karagümrük – Trabzonspor 3:4
Tyaqo Çukur, 28. Fofana, 90+1; 90+2 – Auqusto, 19. Onuaçu, 35; 45+8-p. Sikan, 88.
Trabzonspor: Onana, Pina (Boran Başkan, 89), Saviç, Bataqov, Arif Boşluk, Oulai, Jabol Folkarelli, Zubkov (Visça, 80), Auqusto (Muçi, 80), Olaiqbe (Sikan, 65), Onuaçu (Salih Malkoçoğlu, 90).
Qaziantep – Samsunspor 2:2
Lunqoyi, 45. Abena, 75 – Van Drongelen, 4. Ndiaye, 19.
Samsunspor: Okan Kocuk, Zəki Yavru, Satka (Borevkoviç, 46), Van Drongelen, Tomasson, Yunus Əmrə Çift (Cəlil Yüksəl, 78), Holse (Makumbu, 88), Nçam, Musaba, Kulibali (Marius, 46), Ndiaye.
Konyaspor – İstanbul BŞ 2:1
Ndao, 16. Opoku, 45+1-öz qapısına – Şomurodov, 57.
İstanbul BŞ: Muhammed Şengezer, Ebosele (Ömər Əli Şahinər, 46), Opoku, Ba, Operi, Kreşpo, Berat Özdəmir (Kaluşinski, 64), Arit (Dəniz Türüç, 77), Yusuf Sarı (Fayzullayev, 64), Brniç (Da Kosta, 46), Şomurodov.
Çaykur Rizəspor – Kasımpaşa 1:2
Papanikolau, 60 – Geye, 35. Ben Uanes, 90+3.
Kayserispor – Gənclərbirliyi 1:1
Tuçi, 90+1 – Oğulcan Ülgün, 25.
Eyüpspor – Göztəpə 0:0
1. Qalatasaray 7 7 0 0 19-2 21
2. Fənərbaxça 7 4 3 0 12-5 15
3. Trabzonspor 7 4 2 1 9-6 14
4. Göztəpə 7 3 4 0 10-2 13
5. Beşiktaş 6 4 0 2 11-8 12
6. Samsunspor 7 3 3 1 10-2 12
7. Qaziantep 7 3 2 2 10-12 11
8. Konyaspor 6 3 1 2 12-8 10
9. Antalyaspor 7 3 1 3 7-8 10
10. Alanyaspor 7 2 3 2 8-7 9
11. Kasımpaşa 7 2 2 3 7-8 8
12. İstanbul BŞ 6 1 3 2 6-6 6
13. Çaykur Rizəspor 6 1 2 3 4-9 5
14. Eyüpspor 7 1 2 4 4-10 5
15. Kayserispor 7 0 5 2 5-13 5
16. Gənclərbirliyi 7 1 1 5 5-10 4
17. Fatih Karagümrük 7 1 0 6 7-16 3
18. Kocaelispor 7 0 2 5 4-12 2
Bombardirlər: İkardi (Qalatasaray), Onuaçu (Trabzonspor), Rafa Silva (Beşiktaş) – 5.
Turun rəqəmi
7 – son 3 ildə “Qalatasaray”ın başında saysız-hesabsız rekordları yeniləyən Okan Buruk növbəti dəfə adını klub tarixinə yazdırdı. Belə ki, İstanbul nəhəngi tarixində ilk dəfə Türkiyə çempionatında mövsümün ilk 7 turunu maksimum nəticə ilə tamamladı! Ötən mövsüm komanda ilk 6 turda büdrəməmiş və 7-ci turda evdə “Kasımpaşa” ilə bərabərə qalmışdı (3:3). Bu göstəricidə turnirin rekordu “Fənərbaxça”ya məxsusdu. “Fənər” 2023/24-də İsmayıl Kartalla mövsümün ilk 10 turunda xal itirməmişdi.
Turun ulduzu
Pol Onuaçu (Trabzonspor) – ardıcıl 2-ci həftə onu turun qəhrəmanı seçirik. Çünki nigeriyalı forvard komandası üçün mühüm qollar vurmaqda davam edir. Özü də onun qolları, adətən, baxımlı alınır. Bir çoxlarının fikrincə, yekəpər hücumçunun bu tur “Fatih Karagümrük”ə akrobatik zərbə ilə vurduğu qol ilin ən gözəl qoluna namizədlər arasına düşəcək. Onu da bildirək ki, “Trabzonspor”da ikinci mövsümünü keçirən Onuaçu Türkiyə karyerasında ilk dəfə superliqada səfər oyununda dubl etdi.
Turun sitatı
Süleyman Hurma, “Fatih Karagümrük”ün prezidenti:
“Artıq Klublar Birliyinin toplantılarına qatılmayacam. Çünki orda digər başqanlarla birlikdə oturmağımın heç bir mənası yoxdu. Digər Anadolu klublarının da toplantılara qatılmaması üçün əlimdən gələni edəcəm. Türkiyədə böyük klublar qorunur. Bizim kimi öz gücünə nəyəsə nail olmağa çalışanlar isə əzilir. Böyük klublar qalib gələn kimi quzuya çevrilirlər. Heç kimin səsi çıxmır. “Qalatasaray” ilə oyunda da buraxdığımız ilk qolda qayda pozuntusu var idi. O vaxt da heç kimin səsi çıxmadı”.
Oyundan sonra
Okan Buruk, “Qalatasaray”ın baş məşqçisi:
“Açığı, final fitindən sonra qələbənin və rekordun sevincini doyunca yaşamadan paltardəyişmə otağına yollandıq. Çünki son 15-20 dəqiqədə çoxlu səhvə yol verdik. İlk yarıda pis təsir bağışlamasaq da, ikinci hissəni imkanlarımızdan aşağı səviyyədə keçirdik. Yaxşı oynamadan qalib gəldiyimiz bir matç oldu. Fasilədə Torreyranın vəziyyəti yaxşı deyildi. İstinin də təsirindən səhhəti ilə bağlı problem yaşadı. Bu üzdən onu əvəzləməli olduq. Kaan Ayhanla Yunus Akgünün ağrıları olduğu üçün onların xidmətindən faydalana bilmədik. Həm də oyunun sonlarına yaxın artıq fikrimiz “Liverpul”la matçda idi. “Alanyaspor” önəmli fürsətlər yaxaladı və səviyyəli futbol sərgilədi. Rəqibi təbrik edirəm. Qələbə hesabını çətinliklə qoruya bildik. Müdafiədə inamsız təsir bağışladıq və rəqibə qapımız önündə fürsətlər yaxalamağa imkan verdik. Qapıçımız bir neçə epizodda bizi xilas etdi. ÇL matçından əvvəl belə çətin oyunları itkisiz başa vura bilmək önəmlidi. “Liverpul”la oyuna çox yaxşı hazırlaşmalıyıq. Daha yüksək tempdə keçən bir oyun olacaq. İnşallah, həmin oyuna tam heyətlə çıxarıq. Belə oyunların atmosferi fərqli olur. Ona görə də fərqli futbol sərgiləyəcəyimizi düşünürəm. “Liverpul” yaxşı formadadı, yaxşı nəticələr əldə edir. Müdafiədən hücuma çox sürətli çıxan bir komandadı”.
Domeniko Tedesko, “Fənərbaxça”nın baş məşqçisi:
“Qələbəyə həsrət qaldığımız son oyunlarda əslində pis təsir bağışlamamışdıq. Digər tərəfdən, bu gün 3 xal qazanmağımıza baxmayaraq hər şey ideal deyildi. İlk yarının sonlarında rəqibin uzun ötürmələri bizə problemlər yaratdı. Bura gəldiyim gündən bəri ilk dəfə oyuna mən istədiyim şəkildə nəzarət etdik. Hesabı açandan sonra çox fürsət yaxaladıq. Çalışmalıyıq ki, hesabda geri düşərkən də belə futbol sərgiləyək. Rəqibin cərimə meydançasında 29 dəfə topla oynadıq. Bu, çox yaxşı göstərici olsa da, bunun qarşılığında daha çox qol vurmalıydıq. Erkən qollar vura bilmək də önəmlidi. Çünki oyun 0:0 davam etdikcə rəqib də ümidlənir, işlər çətinləşməyə başlayır. Penalti vura biləcək 4-5 oyunçumuz var. Talişka yenə topun başına keçmək istədi. Bu da onun cəsarətini və xarakterini göstərir. Gökhan Gönülü daha öncə tanımırdım. Bəzən işlər biz istəmədiyimiz şəkildə irəliləyir. İstefası ilə bağlı özəl bir durum yoxdu. Öz aramızda olan söhbətləri kənara çıxarmaq istəmirəm. Gökhan bu klubun əfsanəsidi, həmişə də belə qalacaq. Onun yerinə başqa məşqçi tələb etməyəcəyik. Çox yaxşı bir məşqçilər korpusuna sahibik. Zəki Murat Gölə uzun illərdi burda çalışır və bizə gözəl yardım edir. İndi ondan daha çox faydalanacağıq”.
Fatih Təkkə, “Trabzonspor”un baş məşqçisi:
“Qalib gəldiyimiz üçün sevincliyik. Ümumi götürəndə qələbəyə layiq futbol sərgilədik. Maraqlı və qəribə oyun oldu. Son anlar sıxıntılı keçdi. Futbolda bir qədər arxayınlaşan kimi rəqib səni cəzalandırır. Bir qədər də vaxt olsaydı, ciddi problemlər yaşaya bilərdik. Həm də gənc oyunçularımız çoxdu. Heyətimizin orta yaş həddi 20-25-di. Bəzən səhvlər baha başa gəlir. Ona görə də diqqətli olmalıyıq. Penalti epizodu çox şübhəlidi. Məncə, penalti yox idi və bu fikrimi 4-cü hakimə də söylədim. Onuaçu mükəmməl qol vurdu. Etiraf edim ki, o qolu heç mən də vura bilməzdim (gülür). O, bu tərzdə qolları daha çox vurmalı və daha yaxşı formada olmalıdı”.
Digər xəbərlər
