“Kopenhagen” üzərində mümkün qələbə “Qarabağ”ın xalını 6-ya çatdıracaq. Bundan sonra isə ilk 24 komanda sırasına düşmək üçün yalnız və yalnız 5 xal lazımdı!” – sentyabrın 20-də bunu yazarkən sanki fala baxmışdım. Amma fala-zada baxmamışdım, ürəyimə də heç nə dammamışdı. Sadəcə, bütün azərbaycanlı futbolsevərlər kimi mən də “Kopenhagen”i udmağın qeyri-adi vəzifə olmadığını anlayırdım. Şükür, arzular və proqnozlar doğruldu, “Qarabağ” indi 6 xalla turnir cədvəlində liderliyi bölüşür.

Maşallah, artıq bütün Azərbaycan hesablayır, xal qazanmağın mümkün olduğu və olmadığı oyunları sıralayır. Futbolda bu hər nə qədər çətin olsa da, gəlin, biz də cəhd edək. Həm də sadə, formal məntiqin ehkamları əsasında. “Çelsi”, “Napoli” və “Liverpul”la oyunları bir kənara tolazlayaq, bunlar yalnız divara dirənəndə, heç bir çarəmiz qalmayanda xal mənbəyi kimi baxa biləcəyimiz oyunlardı. Mən bu yaşda realist olmağa üstünlük verirəm, xəyal qurmaq fikrim yoxdu!

Yerdə üç oyun qalır – “Atletik”lə səfərdə, “Ayaks” və “Ayntraxt” ilə evdə. Oyundan-oyuna prinsipi ilə yürüsək, elə Bilbaodan başlamalıyıq! Türkiyə ilə sentyabrın 7-də keçirilən oyundan sonra zədəsi üzə çıxan Niko Uilyamsın bir də 6 həftə sonra meydana dönəcəyi deyilmişdi. Deməli, onun “Qarabağ”a qarşı oynaması mümkündü. Nikolu və Nikosuz “Atletik” fərqli komandalardı ki, bunu son vaxtların nəticələri də göstərir. Niko oldu-olmadı, “Qarabağ” oktyabrın 22-də xal üçün oynamalıdı, yaxşı olar ki, 3, heç olmasa, 1 xal üçün! Amma bu hələ heç nə deyil. Həqiqət anı 6-7-ci turun oyunlarında yetişəcək.

“Qarabağ” dekabrın 10-da “Ayaks”ı, yanvarın 21-də “Ayntraxt”ı qəbul edəcək. Mən bu iki oyunda 4 xal üçün sinov gedirəm. “Qarabağ”ın qış fasiləsində güclənmək ehtimalını da nəzərə alsaq, niyə də olmasın?! Amma sırf rəqəmlər üzərində oynayırıqsa, iki heç-heçədən bir qələbə daha sərfəlidi. Ümumiyyətlə, ÇL-in ötənilki təcrübəsi göstərir ki, 3 qələbə qazanmayan komandanın ilk “24-lüy”ə düşmək şansı minimuma bərabərdi. Turnir cədvəlinə baxaq:

...20. Yuventus 8 3 3 2 9-7 12
21. Seltik 8 3 3 2 13-14 12
22. Mançester S. 8 3 2 3 18-14 11
23. Sportinq 8 3 2 3 13-12 11
24. Brügge 8 3 2 3 7-11 11
25. Dinamo Z 8 3 2 3 12-19 11
26. Ştutqart 8 3 1 4 13-17 10...

Gördüyünüz kimi, “Dinamo” ilə “Ştutqart”ın acı təcrübəsi hətta 3 qələbənin də hədəfə çatmağa imkan vermədiyini göstərir. Əlbəttə, bütün bunlar Quran ayəsi deyil. Məsələn, 9 və ya 10 xal da səni hədəfinə çatdıra, ya hətta 12-13 xal da çatdırmaya bilər. Amma biz əvvəlcə 3-cü qələbəni qazanaq ki, sonra da növbəti oyunlar üçün planlar quraq. Yenə o fikrin üzərində dayanıram ki, “Qarabağ” ilk “24-lüy”ə məhz “Ayaks” və “Ayntraxt” ilə oyunlardakı uğur hesabına düşə bilər. Düşməyə borclu deyil, sənin, mənim – ölkənin qarşısında bu yöndə heç bir öhdəliyi yoxdu. Amma düşsə, nə əla, nə gözəl, nə möhtəşəm!

Təsəvvür edirsizmi, hədəfə aparan yolun yarıdan çoxunu arxada qoymuşuq. Hətta bu hissi yaşamaq belə gözəldi!

HUŞƏNG