Ataman ən yaxşı baş məşqçi sayıldı, Şəngün rəmzi yığmaya düşdü
Kişi basketbolçular arasında Avropa çempionatının yekunlarına toxunmuşduq.
Xatırladaq ki, Türkiyə yığması finalda Almaniyaya 83:88 uduzmaqla tarixində ilk dəfə qitə çempionu olmaq şansını əldən verdi. 2-ci dəfə bu uğura nail olan almanların baş məqşqçisi Alan İbrahimoviç isə qələbəni belə şərh edib:
“Xoşagəlməz vəziyyət üzündən komandanı çalışdırmalı oldum. Aleks Mumbru komandanın baş məşqçisidi, bu komandanın bir hissəsi olmaq mənim üçün böyük şərəfdi. Mən həm də gənclər komandasının baş məşqçisi kimi sevinirəm. Bizdə istedadlı oyunçuların sayı çoxdu. Dennis Şrederin və onun nəslindən olan basketbolçuların əsas missiyası bundan ibarətdi – daha çox adamı basketbola cəlb etmək, bu oyuna marağı artırmaq, Almaniuyanın bundan da artıq inkişafına nail olmaq. Bu dəfə bunu bacardılar. Amma gələcəkdə də belə olmalıdı”.
İbrahimoviçin adını çəkdiyi Mumbru ilə bağlı da yeni xəbər var. Baş məşqçi çempionluq münasibəti ilə Frankfurtda keçirilən təntənəli mərasimə də qatılmayıb. İş ondadı ki, mütəxəssis qələbənin ardından kəskin pankreatit diaqnozu ilə xəstəxanaya çatdırılıb. “Mundo Deportivo”nun yaydığı xəbərə görə, qitə çempionluğunun ardından baş məşqçi tibbi müayinədən keçmək üçün Barselonaya yollanıb. Həkimlər isə onun dərhal xəstəxanaya yatırılmasına qərar verib. İspaniyalı mütəxəssis əvvəlcə kəskin pankreatitlə bağlı müalicə almalıdı. Ardından onun öd kisəsi götürüləcək.
Qəzetimizin ötən sayında almanların oyun qurucusu Dennis Şrederin turnirin ən dəyərli oyunçusu sayıldığını xəbər vermişdik. 32 yaşlı Şreder tarixə həm AÇ-nin, həm də DÇ-nin ən yaxşı oyunçusu sayılan 7-ci basketbolçu kimi düşüb. Əvvəllər bunu yalnız Drajen Dalipaqiç, Drajen Petroviç, Toni Kukoç, Dirk Novitski, Pau Qazol və Sergey Belov bacarıb.
Şrederlə yanaşı, AÇ-də başqa nominasiyalar üzrə seçilənlər də var. Türkiyəli mütəxəsis Ərgin Ataman turnirin ən yaxşı məşqçisi sayılıb. “Ay-ulduzlular” onun rəhbərliyi altında son 24 ildə ilk dəfə finala çıxdı. Qrup mərhələsini məğlubiyyətsiz adlayan qonşularımız pley-offda İsveç, Polşa və Yunanıstanı da sıradan çıxarıb.
Almaniya yığmasının forvardı İsaak Bonqa AÇ-nin müdafiə planlı ən yaxşı oyunçusu sayılıb. 25 yaşlı basketbolçu hər oyunda orta hesabla 9,9 xal toplayıb, 4,3 ribaund edib, 2,1 məhsuldar ötürmə verib, 1,4 top ələkeçirmə ilə yadda qalıb. Yeri gəlmişkən, finalın ən yaxşısı da məhz Bonqa olub.
AÇ-nin rəmzi yığması da açıqlanıb. İlk “5-liy”ə adı çəkilən basketbolçular düşüb: Dennis Şreder (Almaniya), Luka Donçiç (Sloveniya), Frants Vaqner (Almaniya), Yannis Adetokunbo (Yunanıstan), Alpərən Şəngün (Türkiyə). 2-ci “5-lik” də açıqlanıb: Cordan Loyd (Polşa), Cedi Osman (Türkiyə), Deni Avdiya (İsrail), Lauri Markkanen (Finlandiya), Nikola Yokiç (Serbiya).
Digər xəbərlər
