Fernando Muslera ilə yollarını ayırdıqdan sonra uzun müddətdi, qapıçı axtarışında olan ''Qalatasaray'' nəhayət, bu problemi yoluna qoydu.

Maraqlıdı ki, yayboyu Ederson və Donnarumma başda olmaqla bir çox ünlü qapıçılarla danışıqlar aparan İstanbul nəhəngi sonda yerli əlcək sahibinə üstünlük verdi. Söhbət ''Trabzonspor''un kapitanı və Türkiyə yığmasının üzvü Uğurcan Çakırdan gedir.

Bu transfer artıq hər iki klub tərəfindən rəsmən açıqlanıb. 29 yaşlı qapıçı ilə 5 illik müqavilə imzalanıb. Onun illik maaşı 2,2 milyon avrodan başlayacaq və ilbəil artaraq sonuncu mövsümdə 3 milyon avroya çatacaq.

Maraqlıdı ki, rəsmi açıqlamalarda məbləğ baxımından fərq var. ''Trabzonspor''un açıqlamasında bu transferin 33 milyon avroya reallaşdığı və müqavilədə şərtə bağlı 3 milyon avroluq bonus maddəsi olduğu qeyd olunub.

''Qalatasaray''ın açıqlamasında isə transferin 27,5 milyon avroya reallaşdığı və 3 milyon avro da bonus maddəsinin olduğu bildirilib. Yəni arada 5,5 milyon avroluq fərq var.

Qeyd edək ki, Uğurcan qaradənizlilərin öz yetirməsidi və indiyə qədər bu klubdan başqa heç yerdə forma geyməyib. Uğurcan Trabzon təmsilçisində ümumilikdə 292 rəsmi oyuna çıxıb. Bir çempionluq olmaqla 4 titul qazanıb və 92 oyunda qapısını toxunulmaz saxlayıb. Onun bu yay ''Fənərbaxça''ya transferi də gündəmə gəlmişdi. Həmin vaxt mətbuatda 15-20 milyon avroluq məbləğ qeyd olunurdu. Ancaq indi bu transfer ''Cim-Bom''a 33 milyon avroya başa gəlib!

Yeri gəlmişkən, bu məbləğ doğrudursa, ''Qalatasaray'' Türkiyə futbolunun ən bahalı ikinci transferini reallaşdırıb. Ümumiyyətlə, Türkiyə çempionunun son dönəmlərdəki xərcləri heyrət doğurur. ''Sarı-qırmızılar'' 1 ay öncə Viktor Osimheni 75 milyon avroya transfer etməklə Türkiyə futbolunda bəlkə də uzun müddət qırılmayacaq bir rekorda imza atdılar. Ötən həftə ''Monako''dan Uilfrid Sinqo 30,7 milyon avroya transfer edilmiş və ən bahalı ikinci transferə çevrilmişdi. Amma göründüyü kimi Uğurcan Sinqonu keçərək ikinci pilləyə yüksəldi.

Başqa sözlə desək, ''Qalatasaray'' son 3 həftədə Türkiyə futbolu tarixinin ən bahalı 3 transferini reallaşdırıb!