“Hesab edirəm ki, oyunu dörd hissəyə bölsək, “Qarabağ” ən yaxşı oyununu Macarıstandakı ikinci hissədə göstərdi. Səfərdə də ilk hissədə o qədər də yaxşı təsir bağışlamadıq. Bakıda yüksək pressinqlə qarşılaşdıq. Macarlar geridən oyun qurarkən hücumlarımızın təşkilinə mane ola bildilər, yaxşı bağlamışdılar. Bunun sayəsində də üstünlük əldə edə bildilər. Qollara baxsaq, mərkəz və cinah müdafiəçələri arasına xeyli sızmalar etdilər, topu ala bilirdilər. Meydanın mərkəzini yara bildilər, üçlü hücum qururdular. Birinci hissədə hesabda önə keçməyimizin əsas memarı Nəriman Axundzadə idi. Onlar bizi sıxıb boşluq axtarırdı. Biz isə topu ələ keçirib Nərimana çatdıranda rəqibin müdafiəsində gərginlik yaşanırdı. Nəriman hətta topu ala bilməyəndə də pressinq edir, rəqib müdafiəsini təzyiq altında saxlayırdı. İlk qola da baxsaq, topu çox məharətlə Ötvösdən aldı və qol ötürməsi verdi. Bundan sonra rəqib yenidən qapımıza yükləndi. Düzdü ki, ilk yarıda yaxşı oynamaqdan daha çox əks-hücumlarda yaxşı olduq. İkinci hissədə də onlar yükəndilər. Qurbanovun əvəzetmələrinin gecikdiyini düşünmürəm. Sadəcə, meydana çıxann futbolçular heç bir rol oynamayacaqdı. Addai meydana çıxandan sonra üçüncü qolu buraxdıq. Həqiqətən də rəqib bizi yaxşı təhlil etmişdi, yaxşı da oynadı. Amma nəticə etibarı ilə iki oyuna görə olan üstünlüyü qoruduq”.