''Qalatasaray'' ''Fənərbaxça''ya yaxşılıq etdi - fanatlar narazı qaldı
''Benfika'' ilə ''Fənərbaxça'' arasında Kərəm Aktürkoğlunun transferi ilə bağlı anlaşma əldə olunsa da, bu başıbəlalı keçid üçün ''Qalatasaray''ın da razılığı olmalı idi. Çünki Kərəmin birinci transfer haqqına məhz ''Cim-Bom'' sahib idi.
''Benfika'' ''Fənər''in təklifi və şərtlər barədə ''sarı-qırmızılar''ı məlumatlandırmışdı. İstanbul nəhəngi 5 iş günü ərzində ''Benfika''ya cavab bildirməli idi.
Maraqlıdı ki, ''Qalatasaray''ın əlinə əzəli rəqibə tarixi bir pislik etmək üçün gözəl fürsət düşmüşdü. ''Sarı-qırmızılar'' 5 gün gözləyəcəkləri təqdirdə klubların avrokuboklar üçün göndərməli olduqları iştirak ərizələrinin vaxtı tamamlanacaqdı. Yəni ''Fənər'' Kərəmin adını avrokubokların iştirak ərizəsinə sala bilməyəcəkdi! Ancaq ''Qalatasaray'' bu fürsətdən yararlanmaq istəməyib. Bunu klubun rəsmisi Eray Yazqan açıqlayıb:
''Benfika'' bizdən Kərəm üçün olan haqqımızdan yararlanıb-yararlanmayacağımızı soruşdu. Onlara cavab bildirmək üçün 5 iş günü vaxtımız var idi. Bu müddət sentyabrın 5-də tamam olurdu. Yəni həmin vaxta qədər avrokuboklar üçün iştirak ərizəsi tamamlanır. ''Fənərbaxça''nın bundan bixəbər olması bizi çox təəccübləndirdi. Hansı kluba azarkeşlik etməyimizdən asılı olmayaraq hər birimiz türkük. ''Qalatasaray'' türk olmayan klubları yenmək hədəfi ilə yaradılmış bir klubdu. Rəqibimiz bizə inanılmaz böhtanlar atır. Amma biz yenə də onlara əxlaq dərsi veririk. Klubumuz onlara Kərəmi iştirak ərizəsinə salmağa mane olmayacaq. ''Qalatasaray'' Türkiyə futbolunun böyüyüdü. ''Fənərbaxça''dan bu məsələ ilə bağlı bizimlə heç kim əlaqə saxlamayıb. Danışıqlar yalnız bizimlə ''Benfika'' arasında davam edir. Yoluna Konfrans Liqasında davam edəcək digər klubumuz ''Samsunspor''a da uğurlar arzulayırıq''.
Maraqlıdı ki, rəhbərliyin bu yaxşılığı camiədə heç də hər kəsin ürəyincə olmayıb. Sosial şəbəkələrdə fanatların müəyyən hissəsi bu duruma etirazını bildirib. Hətta rəhbərliyi va başqan Dursun Özbəki istefaya səsləyənlər də az deyil.
Digər xəbərlər
