Bu gün saat 20.00-da başlayacaq püşkatma mərasimində “Qarabağ”ın Çempionlar Liqasının əsas mərhələsindəki rəqibləri bəlli olacaq.

Bəs Azərbaycan çempionu üçün ən arzuolunmaz və ən arzulanan rəqiblər hansılar ola bilər? Bəribaşdan xatırladaq ki, “Qarabağ”ın bəxtinə hər səbətdən iki komanda düşəcək. Ağdamlılar bu komandalardan biri ilə evdə, o biri ilə səfərdə oynayacaq.

Daha bir önəmli məqam odu ki, “Qarabağ” bir ölkənin təmsilçiləri ilə ikidən artıq oyun keçirə bilməz.

1-ci səbət əjdaha yuvasıdı: PSJ, “Real”, “Mançester Siti”, “Bavariya”, “Liverpul”, “İnter”, “Çelsi”, Dortmund “Borussiya”sı, “Barselona”. Bu səbətdən PSJ, “Bavaria” ən ağır rəqiblər ola bilər. Düzdü, “Real”, “Barselona”, MS, “Liverpul” da var, lakin “alman maşını” rəhmsizdi, vura bildiyi qədər qol vurur. Təsadüfi deyil ki, ötən mövsüm Zaqreb “Dinamo”su məhz münhenlilərdən buraxdığı 9 topa görə pley-offa yüksələ bilmədi. PSJ isə son çempiondu, bu gün üçün Avropada ən yaxşı formada olan komandalardandı.

2-ci səbətdəki arzuolunmaz rəqiblər “Arsenal” və “Atletiko”du. Hər iki komanda Bakıda oynayıb, özü də məhz “Qarabağ”a qarşı. Dieqo Simeonenin intiqam hissi də var. 8 il əvvəl məhz “Qarabağ” madridlilərin qrupdan çıxmasına mane olmuşdu. La Liqaya uğursuz başsalara da, məhz “hindular” “Qarabağ”a 2-ci səbətdən düşə biləcək ən çətin rəqibdi. “Arsenal” da “Qarabağ” kimi komandalara münasibətdə amansız olur. Artetanın komandası bu mövsüm uğurlu olmaq üçün əlindən gələni edəcək – istər premyer-liqada, istərsə də Avropada.

3-cü səbətdən “Qarabağ”a düşə biləcək ən ağır rəqib “Napoli” və “Sportinq”di. “Napoli” A seriyasının son çempionudu. Kontenin rəhbərliyi altında sabit çıxış edən neapollular bu mövsüm də uğurlu komanda olmağı hədəfləyir. “Qarabağ”a isə ciddi problem yaratmaq iqtidarındadılar. “Sportinq”ə Dyökereşin gedişindən sonra da maksimum məhsuldar olmaq xasiyyətindən əl çəkmir. “Çelsi”, “Bavariya” kimi bu komanda da son saniyəyə qədər qol vurmaqdan ötrü alışıb-yanır. 2018/19 mövsümündə Bakıda qapımızdan 6 top keçirən komanda da məhz Lissabon təmsilçisidi.
4-cü səbətdə də güclü komandalar var. Bu səbətdən “Kopenhagen” və “Qalatasaray” təhlükəlidi. Düzdü, 8 il əvvəl məhz “Kopenhagen”i məğlub edib qrup mərhələsinə düşmüşdük. Lakin indi danimarkalılar daha güclüdü, “Qarabağ”a maneə törədə bilərlər. “Qalatasaray” ilə bəlkə iki-üç mövsüm əvvəl başabaş oynamaq olardı. Amma bu heyətdə Osimhen, Sane, İkardi, Morata var.

Bəs düşə biləcək ən münasib rəqiblər?
1-ci səbətə baxsaq, belə rəqib, ümumiyyətlə, yoxdu. Bəlkə “İnter”lə “Borussiya”nın adını çəkmək olar. “İnter”in müdafiədən oyun qurması, “Borussiyanın” isə həm ad, həm də ümumi komanda olaraq, səbətin digər klublarından geri qalması arzulanan rəqib kimi onları seçməyimizə şərait yaradır.

2-ci səbətdən Frankfurt “Ayntraxt”ı ilə “Brügge”ni deyə bilərik. Əslində “Yuventus”u da qeyd etmək olardı – komanda beş ildi özünə gələ bilmir. Belə qeyri-sabit komandadan da xal olmaq olar.

3-cü səbətdən Avropa Liqasının iyi gəlir. Burdakı bir neçə klubla ötən mövsüm Avropa Liqasında da qarşılaşmışıq. Ən uyğun rəqib kimi “Slaviya” ilə “Bude/Qlimt”i demək olar. Düzdü, skandiyavılılar həddən artıq güclüdü, amma burda zəif rəqib yoxdu. 4-cü səbətdəki əksər komandalarla oynamaq olar. Məsələn, “Kayrat”la 2021/22 mövsümündə qarşılaşmışdıq və hər iki oyunda qələbə qazanmışdıq. “Pafos” da, “Yunion” da uyğun rəqibdi.

Hər halda, rəqiblər kim olur-olsun, “Qarabağ”dan yenə də uğurlu, inamlı mübarizə gözləyirik.

MÜZƏFFƏR QULUZADƏ