“Hemilton başqa mühitdə 20 il keçirib”
“Ferrari”nin britaniyalı pilotu Lüis Hemilton nəticələrdən asılı olmayaraq, bu komanda ilə müqavilə müddətini 2027-ci ilə qədər uzada bilər. Bu haqda xəbəri “La Gazzetta dello Sport” yayıb.
Adı çəkilən nəşr iddia edir ki, müqavilə müddətinin uzadılması 40 yaşlı pilotun xeyrinə yazılıb. Bu, Hemiltonun komandanın işlərində fəal iştirak etməsinin səbəblərindən biridi. Nəşr qeyd edir ki, britaniyalı “Ferrari”nin baş direktoru Con Elkann ilə bəzi vacib qərarlar haqda danışıb, menecer Frederik Vasser ilə yeni müqavilənin təsdiqlənməsinə nail olub, həmçinin SF-25 bolidinin işini daha da yaxşılaşdırmaq üçün mühəndislərə bəzi sənədlər göndərib. Hemilton 2025 mövsümündə 109 xal toplamaqla pilotların yarışında 6-cı pillədə qərarlaşıb.
Bu arada Vasser də Hemiltonun İtaliya komandasına uyğunlaşma prosesi haqda danışıb:
“Mənə elə gəlir ki, Lüisin mövsümün əvvəlindəki çətinliklərini lazımi qaydada dəyərləndirməmişik. O, “Maklraen”də, demək olar ki, 10 il keçirib, ardından daha 10 il “Mersedes”də olub. Yəni 20 il faktiki eyni mühitdə. Mədəniyyət, ətrafdakı adamlar, maşın haqda danışsaq, bu, Lüis üçün nəhəng çağırışdı. Hər şeydə böyük dəyişikliklər var. Ancaq mən razıyam, o, son dörd-beş mərhələdə yenidən səviyyəsini göstərməyə başlayıb”.
Digər xəbərlər
