Futbol ictimaiyyəti premyer-liqada yeni mövsümün başlamasını səbrsizliklə gözləyir, necə deyərlər, həmin günü iplə çəkir. Baxmayaraq ki, indidən ortaya çıxan xeyli problem çempionatın həm keyfiyyətinə kölgə salır, həm də mövsüm ərzində daha ciddi çatışmazlıqların ortaya çıxacağıyla bağlı xəbərdarlıq siqnalları ötürür.

Təbii ki, bu sırada ağla birinci "İmişli" gəlir. 1-ci liqada son mövsümü ikinci pillədə tamamlayan Aran təmsilçisi AFFA İcraiyyə Komitəsinin qərarıyla premyer-liqaya yüksəlsə də, işə peşəkar yanaşmaqda çətinlik çəkir. Kollektivin yay təlim-məşq toplanışı çərçivəsində keçirdiyi 6 yoxlama matçında iki qələbə qazandığından xəbərdarsız. Həmin qələbələrin "Sabah"la "Araz-Naxçıvan"ın əvəzedici komandaları üzərində qazanılması özlüyündə böyüdüləcək nəticə deyil, lakin "İmişli"nin "Sumqayıt-2" ilə bacarmaması nəyəsə işarədi. Bundan başqa, "İmişli"nin 7 legioner, 6 yerli futbolçu ilə gücləndiyi, 13 oyunçuyla isə yolları ayırdığı məlumdu. Baş məşqçi postunda əyləşən Xorxe Kaskilyanın karyerası haqda ətraflı məlumatla da tanışsız. Portuqaliyalı mütəxəssisin sonuncu iş yeri olan Çexiyanın 3-cü liqa iştirakçısı "Znojmo"da cəmi 9 oyunda iş başında olduğu, uğursuz nəticələr üzündən istefaya göndərildiyi sirr deyil. Ümumiyyətlə, 56 yaşlı çalışdırıcı son 9 ildə hansısa klubda 6 aydan çox qala bilməyib. İstənilən halda, bu mövzuda suallara zaman aydınlıq gətirəcək. Başqa sözlə, tezliklə komandanın gücünə bələd olacağıq. Ancaq "İmişli" ilə bağlı elə problem var ki, eşitsə, bişmiş toyuğun da gülməyi gələr!

Xatırlayırsızsa, "İmişli"nin ev oyunlarını Quba Olimpiya Kompleksinin stadionunda keçirmək ehtimalının böyük olduğunu yazmışdıq. Hətta Peşəkar Futbol Liqası ilə "CBC Sport"un adı çəkilən bölgəyə üz tutaraq idman qurğusunu təftiş etdiyi məlum idi. Avqustun 9-da aydın oldu ki, komandanın ev oyunlarını burda keçirməsinə icazə verilməyib. Niyə? Ona görə ki, "İmişli" stadionda aparılan təftiş zamanı üzə çıxan çatışmazlıqları vaxtında aradan qaldırmayıb. Belədə AFFA ilə PFL-in müdaxiləsinə ehtiyac duyulub və qərar verilib ki, klub cari mövsümdə ilk iki ev oyununu Şamaxı şəhər stadionunda keçirsin. Bu o deməkdi ki, "Karvan-Yevlax" və "Şamaxı" ilə yanaşı, "İmişli" də ev oyunlarını Şamaxıda keçirəcək. Belə məqamda Ayxan Abbasovun komandasının srağagün "Zirə"yə qarşı keçirdiyi matçdan sonra bu mövzuda dediklərinə haqq verməmək olmur:

Göründüyü kimi, "İmişli"nin işə məsuliyyətsiz yanaşması təkcə öz peşəkarlığına kölgə salmır, həm də AFFA və PFL-in komanda sayının artırılmasından sonra formalaşdırmağa çalışdığı ümumi ab-havanı korlamaqla yanaşı, aşağı büdcə ilə, minimum şərtlər altında premyer-liqada möhkəmlənməyə çalışan "Şamaxı"nın da fəaliyyətini təhlükəyə atır...

Maraqlıdı, bəs klubun qeyri-peşəkarlığı azarkeşlər tərəfindən necə dəyərləndirilir? İmişlidən olan futbolsevərlər komandanın gələcək taleyindən narahat deyillərmi? Bu suallarla "Küdrü Qartalları" fanklubunun rəhbəri Əli Əliyevə müraciət etdik: Bu gün "İmişli"nin taleyi klub rəhbərliyinin əlindədi. Rəhbərlik İmişli kimi futbolun sevildiyi bölgənin premyer-liqadakı taleyini yaxşı mənada həll etməli, çiyinləri üzərində olan məsuliyyətin nə dərəcədə böyük olduğunu anlamalıdı. Əlbəttə, fələyin çarxının bizə nə göstərəcəyini bilmirik. Lakin hadisələrin axarı klubun gəldiyi yerə - 1-ci liqaya dönməsiylə nəticələnə bilər. İndi İmişli futbolu ön planda olmalıdı. Bunun üçün vaxt var. Necə deyərlər, ziyanın yarısından qayıtmaq da xeyirdi. Vay o gündən ki, kimsə ziyandan şəxsi mənafeyi üçün faydalansın...

KƏNAN BAHADIR