Məlum olduğu kimi, “Sabah” Konfrans Liqasının 2-ci təsnifat mərhələsinin cavab oyununda “Selye”nin qonağı olacaq. Sabah saat 22.00-da start götürəcək matç “Zdejele” stadionunda keçiriləcək. Masazır təmsilçisi Sloveniyaya azarkeşsiz yollansa da, bu ölkədə yaşayan azərbaycanlıların dəstəyindən faydalanmağa çalışacaq.

Bəs “Selye” üçün tərəfdarlarla bağlı məsələ nə yerdədi? Kollektiv 13059 tamaşaçı tutumuna malik idman qurğusunun dolu tribunaları önündə döyüşə biləcəkmi?

“Football-plus.az” bu sualın cavabını klubun rəsmi saytında tapdı: “qraflar”ın oyun üçün satışa çıxardığı biletlərin əksəriyyəti satılıb.

Şəkildən də göründüyü kimi, 24 sektordan yalnız dördünün biletləri tam satılmayıb. Bu da təxminən 11 minə yaxın biletin satılması deməkdi. Deməli, oyunun startına qədər bütün biletlərin sahibini tapacağını düşünmək olar.

Görünür, “Selye” ötən mövsüm qazandığı uğurlar və Masazırdan qələbə ilə qayıtması hesabına tribunaları dolduracaq.

Maraq üçün qeyd edək ki, biletlərin qiyməti uşaqlar üçün 7, böyüklər üçün 17 avrodu. Matç günü satılan biletlər 2 avro baha olur.

KƏNAN BAHADIR