"Qarabağ" Şuşaya səfəri zamanı Ağdamda inşa olunan "İmarət" stadionunun tikinti prosesi ilə tanış olub.

"Football-plus.az" xəbər verir ki, Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı çərçivəsində inşa edilən arena üçün 19,2 hektarlıq ərazi ayrılıb.

"İmarət" stadionu UEFA-nın 4-cü kateqoriya tələblərinə uyğun şəkildə tikilir. Stadionun təbii ot örtüyünə malik meydanı olacaq və tribunalar 11 min 700 tamaşaçı tutumuna hesablanıb. Arenada UEFA-nın tələblərinə əsasən, VVIP və VIP "lounge" zonaları, konfrans zalı, iclas otaqları, hakim otaqları, komandalar üçün paltardəyişmə otaqları, media otaqları, muzey, şərhçi otaqları, inzibati və yardımçı otaqlar inşa olunacaq. Stadion ərazisində əlavə məşq meydanı, qaçış zolağı, avtodayanacaqlar, nəzarət-buraxılış məntəqələri, texniki bina və digər tikililər də nəzərdə tutulub.

Şəhər sakinləri stadionun ərazisindən park və əyləncə zonası kimi də istifadə edə biləcəklər. Bunun üçün stadionda fitnes zalı, kafe, restoran və mağazaların istifadəyə verilməsi planlaşdırılır.

Stadionda müasir monitorlar, nəzarət sistemləri, giriş-çıxış, səs, işıqlandırma və kommunikasiya sistemləri quraşdırılacaq. Burada həm yerli, həm də beynəlxalq səviyyəli yarışların keçirilməsi mümkün olacaq.