Bəli, premyer-liqa futbol ictimaiyyətinin əksər nümayəndələri tərəfindən ifadə edilən "Bakı çempionatı" statusundan xilas olmağa çalışır.

"Turan Tovuz", "Şamaxı" və "Araz-Naxçıvan" kimi bölgə təmsilçilərinin ardından "Qəbələ", "İmişli" və "Karvan"ın da elita klubları sırasında qərarlaşmasına yalnız sevinmək olar. Əlbəttə, uzun illərdi bu yarışda varlığını qoruyub-saxlayan "Qarabağ"la "Kəpəz"i də unutmamalıyıq.

Qısası, 2025/26 mövsümündə iştirak edəcək 12 komandadan səkkizi bölgə təmsilçisi olacaq. Ancaq nədənsə bunu fikirləşəndə qəlbdə təkcə sevinc yox, həm də kədər hissi yaranır. Niyəsi məlumdu.

"Qarabağ"la "Araz-Naxçıvan" növbəti mövsümdə də ev oyunlarını Bakıda keçirəcək. Çünki "İmarət" və Naxçıvan şəhər stadionlarının araya-ərsəyə gətirilməsi üçün azı bir il də vaxt lazım olacaq. Digər tərəfdən, süni ot örtüyünü təbii qazonla əvəzləmək istəyən "Turan Tovuz"un, Gəncə şəhər stadionunda davam edən inşa prosesi səbəbindən "Kəpəz"in durumu ürəkaçan deyil. Nəzərə alaq ki, "sarı-göylər" ev oyunlarını "bozqurd"un stadionunda keçirirdi. Bu azmış kimi, premyer-liqanın tələblərinə uyğun hala gətirilib-gətirilməyəcəyi bəlli olmayan Heydər Əliyev adına İmişli şəhər sadionunun taleyi də bəlli deyil, "Karvan"ın Yevlax şəhər stadionunda görməli olduğu işlərin nə vaxt bitəcəyi də. Yalnız Şamaxı şəhər stadionunun vəziyyəti qənaətbəxş görünür ki, burda da projektor yoxdu. Üstəlik ot örtüyü sünidi.

İş ondadı ki, problem bununla bitmir. "Karvan" ev oyunlarını keçirmək niyyətində olduğu idman qurğusunun ot örtüyünü süni etmək niyyətindədi. "İmişli"nin isə Ağsu şəhər stadionunda meydana çıxacağı haqda xəbərlər var. Və təəssüf ki, həmin arenanın da ot örtüyü sünidi.

Əlbəttə, bir neçə cümlə ilə ölkə futbolunun əcəlinə çevrilən problemi və aradan qaldırılmayacağı təqdirdə özünü büruzə verməyə davam edəcək çatışmazlıqları ətraflı izah etmək mümkün deyil. Ancaq bəhs edilən məsələlərin fəsadları illərdi göz çıxarır. Bu ərəfədə verilən düzgün qərar bəlkə də xeyli klub üçün gələcəyə edilən ciddi yatırımın təməli olacaq. Əks halda, nə klublardan, nə də milli komandalardan “dişə vurulası” uğur gözləmək sadəlövhlükdən başqa bir şey deyil.

Odu ki, bölgə təmsilçiləri çox ciddi sınaqla üz-üzədi. Ya premyer-liqanın söz sahiblərinə çevriləcəklər, ya da "Bakı çempionatı"nın filiallarına...

KƏNAN BAHADIR