Bəli, ölkə futbolunun coğrafiyasını genişləndirmək, bu oyunu bölgələrə yaymaq çox maraqlı və cəlbedici ideyadı. Baxmayaraq ki, bu tendensiya bəzi hallarda şüarçılıq xarakteri daşıyır, pafos niyyətin üstünə çıxır.

Məsələn, “Araz-Naxçıvan” ardıcıl iki mövsümdü Bakıya sığınıb. O boyda Muxtar Respublika heç cür işıqlandırma və qazon problemini çözə bilmir. Mən bu məsələ ilə bağlı siyasi əngəldən də xəbərdaram. Əlbəttə, Zəngəzur dəhlizi açılmayınca, Bakı ilə Naxçıvan arasında birbaşa quru əlaqə bərpa olunmayınca ora səfər edəcək klublar böyük xərclər ilə üzləşəcək. Amma Naxçıvanda bu gün müasir standartlara cavab verən, çempionat oyunlarını qəbul edəsi stadion varmı? Yoxdu!

Dəhliz açılmaqda olsun, biz başqa məqamlara toxunaq. “Qarabağ”ın Ağdamı təmsil etməsi də şərti xarakter daşıyır. 12 qat çempion sabah oyunlarınl məhz Ağdamda keçirməli olsa, adlı-sanlı legionerləri qalacaq, yoxsa baş götürüb qaçacaq? Şəxsən mənim üçün ritorik yox, ağlamalı sualdı. Mümkün köç “Qarabağ”ın əzəmətini azaldacaq. Bunu deyirəm, təfərrüata varmağa ehtiyac görmürəm.


İndi də başqa bir problem yaranıb. AFFA bölgə təmsilçilərini elitaya buraxanda da qınanır, buraxmayanda da. İş ondadı ki, elitada oynamaq haqqı qazanan üç bölgə komandasından yalnız “Qəbələ” standartdlara uyğundu. “Qırmızı-qaralar”ın düşərgəsində də oyunlara “Bakıda, yoxsa Qəbələdə hazırlaşaq” sualı müzakirə mövzusudu, ancaq stadionları yaxşı səviyyədə olduğuna görə istənilən qədər müzakirə edə bilərlər, klubdaxili məsələdi, hər halda, ev oyunlarını doğma şəhərdə keçirəcəklər.

“İmişli” və “Karvan” ilə bağlı vəziyyət fərqlidi. Məsələn, “Qəbələ” rəsmiləri bu iki komandanın stadionunda oynamağın zərərindən danışır, hətta bunun təhlükəli olduğunu deyirlər. AFFA İcraiyyə Komitəsi adı çəkilən komandalara bir il möhlət verdi ki, kəm-kəsirləri düzəltsinlər. Əslində həmin qərardan dərhal sonra işə başlamalıydılar. Amma nə görürük? Həm “İmişli”nin, həm də “Karvan”ın düşərgəsindən Bakıya köçməklə bağlı siqnallar gəlir.

Yaxşı, stadionunuz hazır deyilsə, ilk növbədə qonşu rayonlarla bağlı seçim etməlisiz. “İmişli” “Səbail”in elitadan getməsini gözləmədən AFFA ilə danışığa başlayıb, ev oyunlarını “ASKO Arena”da keçirməklə bağlı razılıq alıb. Bunun nə dərəcədə etik yanaşma olmasıyla işim yoxdu. Məgər sizi Bakıda gözləyən varmı? Bu sual həm “İmişli”yə, həm də “Karvan”a ünvanlanıb. Onsuz da aşağı dəstədən 2-3-cü yerin sahibi kimi gəlməklə autsayder statusu ilə barışmısız. Üstəlik azarkeşiniz də yanınızda olmayacaqsa, nəyə ümid edirsiz?

Bir sözlə, bu yöndə vəziyyət çətindi. “İmişli” ilə “Karvan” hələ elitaya vəsiqənin eyforiyasını yaşayır. Amma buranın standartları da başqadı, tələbləri də, oyun səviyyəsi də. Görəcək günləriniz irəlidədi!

ORXAN