Karyerasını ''Beşiktaş''da davam etdirən Joao Mario ilə bağlı keçmiş dönəmə dair İdman Arbitraj Məhkəməsinin (CAS) qərarı məlum olub.

''Football-plus.az'' xəbər verir ki, Mario Portuqaliya yığması ilə AÇ-2016-nın qalibi olduqdan sonra həmin yay 44 milyon avro qarşılığında ''Sportinq''dən ''İnter''ə transfer olunmuşdu. Həmin vaxt iki klub arasındakı anlaşmaya əsasən Mario Portuqaliyanın başqa bir klubuna yollanacağı təqdirdə ''İnter'' ''Sportinq''ə əlavə təzminat ödəməli olacaqdı.

Bu futbolçunun İtaliya karyerası o qədər də uğurlu alınmadı. O, icarə əsasında ''Lokomotiv'', ''Vest Hem'' və yenə də ''Sportinq''in şərəfini qoruduqdan sonra 2021-ci ildə ''İnter''lə müqaviləsini qarşılıqlı şəkildə ləğv etdi və sərbəst oyunçu statusunda Portuqaliyanın digər nəhəngi ''Benfika''ya transfer olundu. ''Sportinq'' həmin an anlaşmanı əsas gətirərək italyanlardan təzminat tələb etdi. Amma ''İnter'' Marionun artıq onlara məxsus olmadığını və ''Benfika''ya sərbəst futbolçu kimi yollandığını bildirərək təzminat ödəməkdən imtina etdi.

''Sportinq'' istəyinə çata bilmədiyini görərək məsələni FİFA-ya daşıdı. FİFA bu məsələdə italyanların tərəfini tutunca ''Sportinq'' CAS-a da müraciət etməli oldu. Ancaq Lissabon nəhənginin ümidləri yenə doğrulmadı. İdman Arbitraj Məhkəməsi də FİFA-nın qərarını qüvvədə saxladı. İtaliya mətbuatının yazdığına inansaq, söhbət 30 milyon avroluq təzminatdan gedirdi.

Joao Mario ötən yay ''Benfika''dan ayrılaraq Türkiyəyə gəldi. 32 yaşlı yarımmüdafiəçi bu mövsüm ''Beşiktaş''ın heyətində 32 rəsmi oyunda 4 qol, 4 məhsuldar ötürmə ilə fərqlənib.