''Sevilya''nın 2021-ci ildə artıq çəkisi olması üzündən müqaviləsini ləğv etdiyi Joris Nyanyonun məsələsi ilə bağlı yekun qərar açıqlanıb.

"Football-plus.az" xəbər verir ki, İdman Arbitraj Məhkəməsinin (CAS) qərarı ilə Nyanyonun şikayəti təmin edilməyib.

Məhkəmə birmənalı şəkildə ''Sevilya''nın haqlı olduğuna qərar verib. Üstəlik artıq fransalı futbolçunun şikayət etmək haqqı qalmayıb. İspaniya mətbuatının iddiasına görə CAS futbolçunun davranışlarının peşəkarlığa zidd olduğunu bildirərək onun təzminat tələbini rədd edib. Qeyd edək ki, daha öncə andalusiyalıların əleyhinə FİFA-da da 4 milyon avroluq iddia qaldıran Nyanyonun bu tələbi bu də rədd edilmişdi.

CAS-ın qərarında bildirilib ki, ''Sevilya'' tərəfindən müəyyənləşdirilən çəki kriteriyaları tam qaydalara uyğundu. Üstəlik məlum olub ki, İspaniya klubu müqaviləni ləğv etməmişdən əvvəl futbolçuya 4 dəfə xəbərdarlıq edibmiş! Yəni Nyanyonun vəziyyəti düzəltməsi üçün bir neçə dəfə ona fürsət verilib. Nyanyonun hazırda 27 yaşı var. O, ''Sevilya''dan ayrıldıqdan sonra vətəninə yollanaraq ''Sent-Etyen''lə müqavilə imzalasa da, cəmi 4 ay sonra ayrılmalı olmuşdu. Fransa mətbuatındakı xəbərlərə görə futbolçu bu klubda da artıq çəki problemi yaşamışdı. Baş məşqçi Paskal Dupraz Nyanyonun kluba gələrkən 20 kq artıq çəkisinin olduğunu demişdi.

Düzdü, peşəkar futbolçular arasında artıq çəki problemi yaşayanlar o qədər də çox deyil. Amma hər halda CAS-ın bu qərarı digərləri üçün də örnək olacaq və futbolçuları daha peşəkar olmağa sövq edəcək. Nyanyon ''Sevilya''ya 2020-ci ildə 15 milyon avro qarşılığında ''Renn''dən transfer olunmuşdu. O, bu klubda cəmi 17 rəsmi oyuna çıxa bilmişdi.

ƏLİ