Yenə “Barsa” “Real”ı, Flik Ançelottini məğlub etdi - İCMAL
Ölkə kubokunun finalı qalmaqalla müşayiət olundu.
“Real”ın klub telekanalı təkcə meydandakı yox, VAR-da çalışan hakimləri də hədəfə aldı, onların Madrid klubu ilə oyunlarda yol verdiyi səhvlərlə bağlı süjetlər hazırladı. Hətta “Real”ın finalı boykot edəcəyi ilə bağlı da şayiələr yayılmışdı. Ancaq iş bu yerə gəlib çatmadı. Və elə yaxşı ki çatmadı! Axı komandalar futbolsevərlərə çox maraqlı “el klasiko” bəxş etdi. Həm “Barselona”nın hesabı açdığı ilk yarıya, həm də ümumilikdə 60-cı dəqiqəyə qədər olan oyuna əsasən kataloniyalıların yenidən rəqibin müdafiəsini yaracağını, asan qələbə qazanacağını düşünmək mümkün idi. Ancaq təcrübəli Ançelotti vaxtında oyunun axarına müdaxilə etməklə nəinki hesabı bərabərləşdirməyə, hətta irəli çıxmağa da nail oldu. Artıq hesabda geri düşən “Barsa” 84-cü dəqiqədə bərabərlik qolunu vurmaq üçün özündə güc tapdı. Uzatma dəqiqələrində oyunun taleyi həll oluna bilərdi.
Maraqlıdı ki, həmin dəqiqələrdə bir mübahisəli penalti epizoduna görə hakim VAR monitoruna dəvət olundu, digərində yox. Hər halda, biz nə oyunda penalti gördük, nə də penalti seriyasını. Əlavə vaxtda “Barsa”nın daha yaxşı təsir bağışladığını etiraf etmək lazımdı. “Blauqrana” rəqibin sonradan meydana çıxan oyunçularının səhvindən lazımınca yararlandı. Sonluq yenə qalmaqal və meydandan kənarda olan futbolçulara göstərilən qırmızı vərəqələr ilə yadda qaldı. Ancaq bunlarsız “el klasiko”nun nə ləzzəti! “Barselona” ölkə kubokunda qələbə sayına görə rekordunu yenilədi, “Real” isə indi yalnız əsas rəqibinin çempionatda büdrəyəcəyinə ümid edir.
final
Barselona – Real 3:2 (1:0, 1:2, 1:0), əlavə vaxtda
Barselona: Şensnı, Kunde, Kubarsi, Martines, Martin (Arauxo, 85), De Yonq (Qavi, 85), Pedri (E.Qarsiya, 98), Yamal, Olmo (Lopes, 64), Rafinya, Torres (Viktor, 115).
Real: Kurtua, Vaskes (Modriç, 55), Asensio, Endrik (Rüdiger, 110), Mendi (F.Qarsiya, 11), Valverde, Çuameni, Sebalyos (Gülər, 55), Bellingem, Rodriqo (Mbappe, 46), Vinisius (Dias, 89).
Qollar: Pedri, 28 (1:0). Mbappe, 70 (1:1). Çuameni, 77 (1:2). Torres, 84 (2:2). Kunde, 116 (3:2).
Vərəqələr: Çuameni, 31. Martin, 37. De Yonq, 68. Modriç, 90+1. Lopes, 90+4. Rafinya, 90+10. Bellingem, 107 – sarı. Rüdiger, 120+3 (meydandan kənarda). Vaskes, 120+4 (meydandan kənarda). Bellingem, 120+4 (meydandan kənarda) – qırmızı.
Hakim: Rikardo De Burqos Benqoeçea (Bilbao).
26 aprel. Sevilya. 57619 tamaşaçı.
Faktlar
* “Barselona” kuboku 32-ci dəfə qazanmaqla öz rekordunu yenilədi. “Atletik” 24, “Real” 20 dəfə bu turnirin qalibi olub.
* “Barsa” cari mövsümdə “Real”la keçirdiyi oyunların hamısında qələbə qazanıb. Kataloniyalılar madridliləri yanvarda Superkubokun finalında darmadağın etmişdi – 5:2. Oktyabrda Madriddə keçirilən çempionat oyununda da “Barsa” qalib gəlmişdi (4:0). Komandalar mayın 11-də 4-cü dəfə üz-üzə gələcək.
* Flik Ançelotti ilə indiyəqədərki duellərin hamısından qalib ayrılıb. Bu, onların 3-cü dueli idi. Əvvəlki iki oyunun ümumi hesabı 9:2 alman mütəxəssisin xeyrinədi.
* “Real” əvvəllər heç vaxt Ançelottinin rəhbərliyi altında bu qədər oyunda uduzmayıb. Madrid nəhəngi cari mövsümdə 13-cü dəfə məğlubiyyətlə barışdı. Bunların 6-sı Çempionlar Liqasında, 5-i La Liqada, 1-i Superkubokda, 1-i də ölkə kubokunda qeydə alınıb. Əvvəllər Ançelottinin çalışdırdığı komanda mövsüm ərzində maksimum 12 dəfə uduzmuşdu.
* Flik indiyə qədər heç bir finalda uduzmayıb. Almaniyalı mütəxəssis yüksək liqa klublarını çalışdırdığı müddətdə 9-cu titulunu qazandı. O, “Bavariya”nın “sükanı arxasında” olarkən iki dəfə bundesliqa çempionluğunu, həmçinin Almaniya kubokunu və Superkubokunu, Çempionlar Liqasını, klub dünya çempionluğunu və Avropa Superkubokunu qazanıb. “Barselona”ya gələndən sonra isə İspaniya kubokuna və Superkubokuna yiyələnib. Yəni Flik bu iki komanda ilə çıxdığı 7 finalın hamısından qalib ayrılıb.
Oyundan sonra
Karlo Ançelotti, “Real”ın baş məşqçisi:
“Yaxı oyun alındı. İlk yarı bizim üçün çətin keçdi, ikincidə daha yaxşı oynadıq. Oyuna nəzarət əlimizdə idi. Qələbəyə çox yaxın olduq. Mübarizəni davam etdirmək lazımdı. Bu gün yaxşı çalışdıq, komandamı heç nədə suçlaya bilmərəm. Qələbə qazansaydıq, bu, sensasiya olmayacaqdı. İkinci yarıda rəqiblə müqayisədə biz qələbəyə daha yaxın idik. Mbappe 90 dəqiqə oynaya bilməzdi, odu ki, onu 2-ci hissədə buraxmağa üstünlük verdim. Onda oyunun ümumi sürəti bir qədər aşağı düşmüşdü. Mbappe yaxşı oynadı, hesabı bərabərləşdirdi. Kuboku başımız üzərinə qaldıra bilmədiyimizə görə acı çəkirik. Ancaq məhz oynamalı olduğumuz kimi oynadıq”.
Hans-Diter Flik, “Barselona”nın baş məşqçisi:
“Komandaya, oyunçularımın bu gün gözəl çalışmasına görə sevinirəm. Onlar, sadəcə, möhtəşəm idi. Komandamlar qürur duyuram. “Real”la oyunda titul qazanmaq həmişə xüsusi hadisədi. Oyunçulara və bu gün stadiona gələn 26 min “Barsa” fanatına görə sevinirəm. Onlar bu kuboku haqq edi. Bu qələbəni bayram edəcəyik. Növbəti gün isə hədəf yalnız və yalnız bərpa olunmaqdı. Trebl mümkündü, ancaq bunun üçün çalışmaq lazımdı”.
Yeri gəlmişkən...
Karlo Ançelotti ən yüksək ödənişli yığma məşqçisi ola bilər. Onun mövsüm bitəndən dərhal sonra “Real”dan ayrılacağını və iyunda Braziliya yığmasının “sükanı arxasına” keçəcəyini iddia edən mənbələrin sayı çoxdu. Həmkarımız Sezar Luis Merlonun yazdığına inansaq, Braziliya Futbol Konfederasiyası artıq italiyalı mütəxəssisə rəsmi maaş təklifi dö göndərib. Ançelotti təklifi qəbul etsə, yığma məşqçiləri arasında qazancaq görə hamını qabaqlayacaq. Don Karloya DÇ-2030-a qədər olan dövr üçün müqavilə təklif olunub, o hələ son sözünü deməyib.
Maraqlıdı...
Ançelotti “Real” rəhbərliyindən analitiklərin sayını artırmağı xahiş etsə də, “yox” cavabı alıb. “Relevo”nun yazdığına görə, italiyalı mütəxəssis çoxdan rəhbərliyə belə xahişlə üz tutub. Axı başqa klublarda analitiklərin sayı daha çoxdu. Məsələn, kubokun final oyununda “Barsa”nın 7 (4 kompütür və kamera ilə), “Real”ın isə cəmi 2 (hər biri noutbukla) analitiki çalışıb.
Digər xəbərlər
