İtaliyalılar yenə Səudiyyə Ərəbistanına yollanacaqlar

İtaliya Superkubokunun keçirilmə tarixi və məkanı müəyyənləşib. Turnir növbəti dəfə Səudiyyə Ərəbistanında təşkil ediləcək.

Bununla da, Asiya ölkəsi 5-ci dəfə İtaliya superkubokuna ev sahibliyi edəcək. Yarış gələn il yanvarın 2-dən 6-dək keçiriləcək. Bu barədə İtaliya Futbol Federasiyasının rəsmi saytı məlumat yayıb.

Superkubok uğrunda yenə 4 komanda mübarizə aparacaq: A seriyasının son çempionu “İnter”, İtaliya kubokunun hazırkı sahibi “Yuventus”, həmçinin uyğun olaraq ölkə çempionatının vitse-çempionu ilə kubokun finalçısı “Milan” və “Atalanta” iddiaçı rolunda çıxış edəcək.

Bütün oyunlar Səudiyyə Ərəbistanının paytaxtı Ər-Riyadda - “Əl-Hilal”ın rəqiblərini qəbul etdiyi “Kingdom Arena”da keçiriləcək.

Yanvarın 2-3-də keçiriləcək yarımfinalda “İnter” ilə “Atalanta” və “Yuventus” ilə “Milan” qarşılaşacaq. Final yanvarın 6-na təyin olunub. İtaliya Superkubokunda 3-cü yer uğrunda oyun nəzərdə tutulmayıb.