Ölülər, eşidirsizmi məni? Bir gün Şeyx Nəsrullah gəlib duracaq sizin başınızın üstündə. Amiranə bir tərzdə deyəcək: “Ey Allahın mömin bəndələri, dirilin! Bax onda, nəbadə Şeyx Nəsrullahın sözlərinə qulaq asasız. Gəlin, sizə bir sirr açım. Elə ki, başınızı qəbirdən çıxarıb durduz ayağa, təzədən qəbrə girmək istəyəcəksiz...

Və ya...

“Neftçi” azarkeşlərinin ölən ümidləri, eşidirsizmi məni? Bir gün klub rəhbərliyi, baş məşqçi və futbolçular gəlib duracaq sizin qarşınızda. Amiranə bir tərzdə sizdən dirilməyinizi istəyəcək. Bax, onda nəbadə onların sözlərinə qulaq asasız. Gəlin, sizə bir sirr açım. Elə ki, yenidən ümidləriniz canlanacaq, təzədən ölməsini istəyəcəksiz. Çünki illərdi olduğu kimi, nə rəhbərlikdə, nə baş məşqçi postunda, nə də heyətdə baş verən dəyişikliklərin faydalı olmadığını görəcəksiz...

“Neftçi” və maddi problem? “Neftçi” və azarkeş dəstəyinin azlığı? “Neftçi” və keyiyyətli futbolçu tapmaqla bağlı çətinlik? “Neftçi” və bütün imkanlara malik klubu uğurlara daşıya bilməyəcək baş məşqçinin olmaması? Bax, bu əsl tragikomediyadı. Və Cəlil Məmmədquluzadənin “Ölülər” əsərindəki ölülər “Neftçi”dən daha diridi! Kefli İsgəndər isə “Neftçi” azarkeşlərindən daha xoşbəxtdi!

KƏNAN BAHADIR