“Forza Neftçi”nin yeni baş məşqçi ilə problemi yoxdu - AÇIQLAMA
“Neftçi” ikiillik aradan sonra yerli baş məşqçiyə həvalə olundu.
Həm də eyni adama, yəni Samir Abasova. 2020-22-ci illər aralığında da “ağ-qaralar”ı çalışdıran mütəxəssis onlara sonuncu çempionluğu qazandırıb. Amma “Sumqayıt”ın “sükanı arxasında” olarkən “Neftçi” fanatlarını tənqid etməsi, həmçinin son günlərə qədər “gənclik şəhəri”ndən ayrılmayacağını dediyi halda, qəfil mövqeyini qəyişməsi dünənki təyinatdan narazıların sayını artırıb.
Xatırladaq ki, “Neftçi” 2020/21 mövsümünə uğursuz başlamışdı. 2-ci dövrənin gedişində “Qarabağ”a 0:6 hesablı məğlubiyyətdən sonra Füzuli Məmmədov baş məşqçi vəzifəsindən uzaqlaşdırıldı. Onda “sükan arxasına” keçən Abasov “qərar qəfil oldu, bir neçə saat içində razılığa gəldik” demişdi. Onda ilk “üçlük”də olan komanda sonda çempionluğu bayram etdi. Mayın 19-da keçirilən həlledici oyunda “Qarabağ”a 1:0 hesabıyla qalib gələn “Neftçi” 7 illik fasiləsən sonra tarixindəki 9-cu və sonuncu çempionluğu qazandı. Amma növbəti mövsüm titulu qorumaq mümkün olmadı. Bakılılar mövsümü ağdamlılardan 19 xal geridə bitirdi. 2022-ci ilin mayında baş məşqçi “sizi istefaya səslədilər, buna münasibətiniz” sualına belə cavab vermişdi:
“Həyatda mövqeyi olmayan insanlardı. Bu gün həmin adamlardı ki, 6 ay bundan öncə, ötən mövsüm yanımızda fırlanır, göyə atıb-tuturdular. Bunlar boş şeylərdi. Məni bura azarkeş gətirməyib, klub rəhbəri gətirib və o da qərar verəcək. Mən xatırlamıram ki, azarkeş hardasa nəyisə həll etsin”.
Abasovun istefasından sonra Laurentsiu Regekampf, Adrian Mutu, Miodraq Bojoviç və Roman Qriqorçuk növbə ilə paytaxt klubunun “sükanı arxasına” keçdi. Amma heç cür vəziyyəti düzəltmək mümkün olmadı. Bu müddətdə hər dəfə Abasovun adı “Neftçi” ilə yanaşı hallananda qətiyyətlə “yox” deyirdi. Elə bir neçə gün əvvəl də həmkarlarımızın sualına “yoluma “Sumqayıt”la davanm edirəm, heç yerə getmək fikrim yoxdu, nə də təklif almamışam” cavabını vermişdi. Belə çıxır ki, Samir bəy yenə bir neçə saatın içində razılığa gəlib. Amma bu “Neftçi” həminki deyil, Abasov! Sizin 3-cü yerdə götürüb çempion etdiyiniz komanda yoxdu, 9 turdu qələbəyə həsrət qalan klub var.
Daha bir maraqlı məqam “Neftçi” azarkeşlərinin nə düşünməsidi. Sizin “mövqeyi olmayan insanlar” dediyiniz azarkeşlər... “Forza Neftçi”nin üzvü Tural Alışovun “Futbol+”ə dedikləri:
“Düzgün qərar olub-olmadığını zaman və nəticələr göstərəcək. Bizə nəticə lazımdı. Nəticə yaxşı olsa, deməli, düzgün qərardı. “Forza Neftçi” ilə Samir Abasov o vaxt baş verən məsələdən sonra görüşüb, anlaşıb. Orda heç bir problem yoxdu. Sırf danışdığı ifadə ilə bağlı ondan sonra görüşdük və söhbət bağlandı. Yəni hazırda “Forza Neftçi”nin Samir Abasovla xüsusi düşmənçiliyi, problemi yoxdu. Nəticəsi yaxşı olacaq, dəstək verəcəyik, pis olacaq, qarşısında duracağıq”.
RÖYANƏ OĞUZ
