Makedoniyalı futbolçu yanğında həlak oldu - o, adamları xilas etməyə çalışırmış...
Təbii fəlakətlər öz yerində, insan səhlənkarlığı da tez-tez faciəyə yol açır. Belə faciələrdən birində Şimali Makedoniyadan olan futbolçu həlak olub. “Şkupi”nin 25 yaşlı yarımmüdafiəçisi Andrey Lazarov gecə klubunda baş verən yanğında həyatını itirib. O, adamları xilas etməyə çalışarkən dəm qazından zəhərlənib.
Bu faciəvi hadisə martın 16-da Koçani şəhərindəki gecə klubunda baş verib. Yerli DNK qrupu “Pulse” adlanan yerdə çıxış edirmiş. Konserti 1500-ə yaxın adam izləyirmiş. Yanğın təxminən saat 5.30-da pirotexniki vasitədən istifadə üzündən başlayıb. Tez alışan materiallardan düzəldilən tavan qığılcım nəticəsində alışıb. Yerli kütləvi informasiya vasitələrinin yaydığı xəbərə görə, qurbanların sayı 59 nəfərdi, 155 adam isə müxtəlif dərəcəli xəsarət alıb.
Həlak olanlardan biri də Şimali Makedoniya çempionatının elitasında yarışan “Şkupi”nin futbolçusu Andrey Lazarovdu. Başqalarının klubdan çıxmasına yardım etməyə çalışan futbolçu özü dəm qazından zəhərlənib. “Şkupi”nin mətbuat xidmətinin yaydığı açıqlamada deyilir:
“Dərin ağrı və kədər hissi ilə bildiririk ki, bu gecə Koçani şəhərində baş vermiş faciəvi yanğında ölənlər arasında futbolçumuz Andrey Lazarov da var. Qəhrəman Lazarov başqalarının yanan ərazidən qaçmasına kömək etmək üçün canını verdi. O, son ana qədər cəsarət və insanlıq nümayiş etdirib, başqalarının həyatını xilas etməyə çalışarkən dəm qazından zəhərlənib. Andreyin qəhrəmanlığı yaddaşımızda onun nəcib xarakterinin və böyük ürəyinin nümunəsi kimi əbədi qalacaq”.
Şəhər xəstəxanasının direktoru Kristina Serafimova brifinqdə jurnalistlərə bildirib ki, ölənlərin yaşı 14-27 arasındadı. Şimali Makedoniyada 7 günlük matəm elan olunub. Baş nazir Hristiyan Mitskoski həmvətənlərinə söz verib ki, faciə nəticəsində yaxınları və dostları həlak olanlara dəstək olmaq üçün əlindən gələni edəcək:
“Koçanidə baş vermiş dəhşətli faciə xəbərini dərin kədər hissi ilə aldım. Bu, bizim hamımız üçün çox kədərli və ağır gündü. Bu qədər gənc həyatın itkisi əvəzedilməzdi. Ailələrin, yaxınların və dostların ağrıları hədsizdi. Bu dərin hüzn anlarında düşüncələrimiz yaxınlarını itirənlərin yanındadı. Yaralıların tezliklə sağalmasını, ölənlərin ailələrinə bu ağlasığmaz itkinin öhdəsindən gəlmək üçün güc arzulayıram. Hökumət və mən əlimizdən gələni edəcəyik ki, heç olmasa, onların dərdini yüngülləşdirək, bu çətin günlərdə onlara kömək edək. Mən bütün səlahiyyətli orqanları - səhiyyə xidmətlərini, polisi, yerli hakimiyyət orqanlarını qurbanlara kömək etmək və onların ailələrini dəstəkləmək üçün təcili tədbirlər görməyə çağırıram”.
Andrey haqda daha nə bilirik? “Şkupi”yə keçməzdən əvvəl yerli “Rabotniçki” və “Tikveş”, Xorvatiyanın “Rudeş” və “Qoritsa” komandalarında oynayıb. O, Şimali Makedoniyanın gənclər yığmasına da çağrılıb. Lazarov cari mövsümdə bütün turnirlərdə 10 oyun keçirib və qol vurmayıb. Sonuncu dəfə martın 15-də “Pelister”lə oyunda meydana çıxmışdı. “Şkupi” 24 turdan sonra 31 xalla turnir cədvəlinin 6-cı pilləsində qərarlaşıb.
Digər xəbərlər
