Türkiyədə baş verən zələlələrdə dünyasını dəyişənlər azmış kimi, bir acı xəbər də Almaniyadan gəlib.

Ötən ilin dekabrında Almaniyada baş vermiş yanğında ağır yaralanan 22 yaşlı Bilal Özkara həyat uğrunda mübarizədən məğlub ayrılıb. Hadisə dekabrın 17-də Şimali Reyn Vestfaliya əyalətində yerləşən Essen şəhərinin Borbek qəsəbəsində baş vermişdi. İkimərtəbəli binada baş verən yanğın zamanı Özkara yatmış vəziyyətdə idi. Hadisə yerinə gələn yanğınsöndürənlər evin damına qalxan zaman orda tüstü içində boğulmaq üzrə olan Özkaranı xilas etmişdilər. Qürbətçi futbolçu ağır yanıqlarla xəstəxanaya yerləşdirilmişdi. “Duysburq”un yetirməsi olan 2000 təvəllüdlü futbolçu Oberliqa adlanan Almaniyanın 5-ci liqa təmsilçisi “Şermbek”in şərəfini qoruyurdu. Klub rəhbərliyi hətta Özkara üçün yardım kampaniyasına da başlamışdı. Amma 68 gündən sonra xəstəxanadan üzücü xəbər gəldi. Gənc futbolçu dünən Rur vilayətində dəfn olundu.