Yay transfer dönəmində Qabriel Paulista, Rafa Silva və Çiro İmmobile kimi tanınmış futbolçuları transfer edərək mövsümə əla başlayan “Beşiktaş”la bağlı daha bir mühüm transfer şayiəsi yayılıb.

"Football-plus.az" xəbər verir ki, İstanbul nəhəngi “Əl-Nəssr”in dünyaca ünlü seneqallı futbolçusu Sadio Maneni heyətinə qatmaq istəyir. Türkiyə mətbuatının yazdığına inansaq, “Qartal”ın başqanı Hasan Aratla “Əl-Nəssr”in prezidenti Musalli Əl-Muammər bir-birini çoxdan tanıyır.

Arat bugünlərdə Səudiyyə Ərəbistanına yollanaraq Əl-Muammər ilə görüşüb. Məhz həmin görüşdə Manenin transferinin şərtləri müzakirə olunub. Təcrübəli forvard Ər-Riyad təmsilçisində xoşbəxt deyil və ayrılmaq istəyir. Elə “Əl-Nəssr” də onun performansından razı deyil və vidalaşmağın yollarını axtarır.

“Beşiktaş”ın əlini-qolunu gücləndirən məqam odu ki, Avropanın əksər ölkələrində artıq “transfer pəncərəsi” bağlanıb. Türkiyədə isə “pəncərə” sentyabrın 13-ü, saat 23.59-da bağlanacaq. Həm bu məqam, həm də Türkiyənin müsəlman ölkə olması Manenin də “Beşiktaş”a maraq göstərməsinə səbəb olub.

Deyilənə görə, bu transfer baş tutacağı təqdirdə tanınmış bir iş adamı da maddi cəhətdən “Beşiktaş”a yardım edəcək. Ancaq bütün bu məqamlardan öncə “ağ-qaralar”ın həll etməli olduğu vacib bir problem var.

Abubakar ayrılsa da, “Beşiktaş”da hələ də 16 legioner var. İstanbul nəhəngi heç cür Daniel Amarti və Aleks Oksleyd-Çemberleyn ilə müqaviləni ləğv edə bilmir. Türkiyədə bu mövsüm, bilindiyi kimi, klublara iştirak ərizəsinə maksimum 14 legionerin adının salınmasına icazə verilir. Yəni “ağ-qaralar” ilk növbədə ən azı üç legionerlə vidalaşmalıdı.

“Liverpul”dan ayrılandan sonra karyerası istənilən məcrada davam etməyən 32 yaşlı futbolçu birillik “Bavariya” macərasının ardından ötən il “Əl-Nəssr”ə gələrək Kriştiano Ronaldo ilə komanda yoldaşı oldu.

Nəinki Ronaldonun, hətta Anderson Talişkanın da kölgəsində qalan Mane bu mövsüm 4 oyunda hesabın iki məhsuldar ötürmə yaza bilib. Ümumilikdə o, “Əl-Nəssr”də 52 rəsmi oyunda meydana çıxaraq 19 qol, 15 məhsuldar ötürmə ilə fərqlənib.