İstanbul klubu bu məşqçini qovmadı
Adətən iddialı görməyə alışdığımız ''İstanbul BŞ'' çox çətin bir dönəmdən keçir.
''Football-plus.az'' xəbər verir ki başakşəhərlilər bu tur doğma meydanda ''Trabzonspor'' önündə 0:3 hesablı acı məğlubiyyətə düçar oldular. Halbuki ''Trabzonspor''un bu mövsüm bu oyuna qədər superliqada səfər qələbəsi yox idi. Oyunun gedişində İstanbul klubunun baş məşqçisi Çağdaş Atan növbəti dəfə fanatlar tərəfindən istefaya dəvət olundu.
Ötən tur autsayder ''Kayserispor''la səfər oyunundakı 1:3 hesablı məğlubiyyətdən sonra da fanatlar bu məşqçini istefaya səsləmişdi. Bu dəfəki uğursuzluğun ardından Atan istefa verə biləcəyinə işarə vuraraq rəhbərliklə görüşəcəyini bildirdi. Amma həmin görüşdən istefa qərarı çıxmadı. Klubdan verilən rəsmi açıqlamada bu ifadələr qeyd olundu:
''Baş məşqçimiz Çağdaş Atanın tələbi ilə başqanımız Göksəl Gümüşdağ və idarə heyətinin üzvlərinin iştirakı ilə təcili toplantı keçirilib. Bu toplantının nəticəsində ötən mövsüm bizi avrokuboklara daşıyan, bu mövsüm Konfrans Liqasında komandamızı əsas mərhələyə yüksəldən, eləcə də müqaviləsi davam edən baş məşqçimizlə yola davam etmək qərarı qəbul edilib. Ona və köməkçilərinə qarşıdakı oyunlarda uğurlar arzulayırıq''.
Qeyd edək ki, 2019/20 mövsümündə tarixinin ilk və hələ ki, yeganə çempionluğunu qazanan ''İstanbul BŞ''nin son 6 rəsmi oyunda cəmi 1 qələbəsi var (2 heç-heçə, 3 məğlubiyyət). Komanda 26 oyuna topladığı 36 xalla 8-ci pillədə qərarlaşıb və avrokuboklar zonasından 7 xal geridədi.
ƏLİ
