Bu gün AFFA İntizam Komitəsinin iclası keçirilib.

"Football-plus.az" xəbər verir ki, iclasda Misli premyer-liqasının 23-cü turunda baş verən qayda pozuntuları ilə bağlı qərarlar qəbul edilib.

“Neftçi” – “Qarabağ” oyununda “Neftçi”nin azarkeşləri tərəfindən meydançaya kənar əşya atıldığına görə “ağ-qaralar" 800 manat cərimə edilib. Oyunda meydan sahiblərinin azarkeşləri tərəfindən rəqibin ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə 3-cü dəfə yaşandığına görə paytaxt təmsilçisi 1000 manat cərimə edilib. "Qarabağ” 4 futbolçusu sarı vərəqə aldığına görə 700 manat cərimə edilib.

Oyunun 22-ci dəqiqəsində "köhlən atlar"ın futbolçusu Kevin Medina ciddi qayda pozuntusuna görə birbaşa qırmızı vərəqə aldığı üçün 2 oyun cəzalanıb. “Qarabağ” 1500 manat cərimə edilib.

Ağdam təmsilçisinin azarkeşləri tərəfindən rəqibin ünvanına kütləvi şəkildə təhqiramiz ifadələr səsləndirildiyinə və bu hal cari mövsümdə 3-cü dəfə yaşandığına görə “Qarabağ” 1000 manat cərimə edilib.

“Turan Tovuz” – “Araz-Naxçıvan” oyununun 47-ci dəqiqəsində “qırmızı-ağlar" futbolçusu İqor Ribeyro rəqibi aşkar qol imkanından məhrum etdiyinə görə birbaşa qırmızı vərəqə aldığı üçün 1 oyun cəzalanıb, Muxtar Respublika təmsilçisi 1000 manat cərimə edilib.