Bilindiyi kimi, “Kəpəz” 4 aya yaxındı adı hələ məxfi saxlanılan şirkət tərəfindən maliyyələşdirilir. Burda diqqətiçəkən məqam klubla sponsor arasında rəsmi müqavilənin imzalanmamasıdı.

Düzdü, artıq təqdimatın martın 10-a qədər baş tutmaq ehtimalının böyük olduğunu yazmışıq. Lakin prosesin gecikmə səbəbi maraqlıdı. Tərəflər nədə razılığa gəlməkdə çətinlik çəkir?

“Football-plus.az” bu suallara cavab axtararkən məlum oldu ki, konkret anlaşmanın yubanma səbəblərindən birincisi İlqar Nadiri olub. Klubun İdarə Heyətinin sədri əvvəlki sponsor namizədləriylə münasibətdə olduğu kimi, bu dəfə də müəyyən şərtlərlə çıxış edib. Bunlardan ən əsası isə klub rəhbərliyində təmsil olunmaqdı. Hər halda, bu məsələ bağlanıb. Daha doğrusu, Nadiri istəyindən vaz keçib. Düzdü, onun klubdan hansısa vəzifədə qalması mümkündü. Lakin funksioner burda söz sahibləri sırasında olmayacaq.

İkinci əngəl isə klubun sabiq idman direktoru olan Mehman Allahverdiyevdi. İndi “Kəpəz”lə bağlı vacib sənədlərdə adı keçən futbol adamının imzasına ehtiyac var ki, Mehman bəy hələ ki lazımi sənədlərə qol çəkməyib. Təbii ki, biz mövzuyla bağlı onunla əlaqə saxlamağa cəhd etdik. Lakin zənglərimiz cavabsız qaldı. Hər halda, Allahverdiyev “Kəpəz”in indiyə qədər qazandığı uğurların memarlarından sayılır. Əlbəttə, ölkəmizin ən titullu məşqçilərindən birinin, özü də gəncəli olan Mehman bəyin “Kəpəz”lə bağlı pis niyyəti ola bilməz. Bu üzdən onun tezliklə kluba lazım olan yardımı edəcəyinə inanırıq!

KƏNAN BAHADIR