Deşamdan iki vacib açıqlama
Bilindiyi kimi, Didye Deşam gələn il Fransa yığmasının baş məşqçi vəzifəsini tərk edəcək. Maraqlıdı ki, o, həmyerlisi Zinəddin Zidanən adını çəkib.
“RMC Sport”un yaydığı xəbərə görə, ötən il DÇ-2026-nın final mərhələsindən sonra milli komandanı tərk edəcəyini açıqlayan mütəxəssis Zidanı baş məşqçi vəzifəsinə əsas namizəd adlandırıb:
“Aramızda böyük hörmət var. Axırıncı dəfə bir-birimizi 2023-cü ilin yayında görmüşük. Gələn yay yenidən görüşməliyik. Zidan yığmaya çox yaxşı namizəddi. Onun milli komandaya gəlişi gözləniləndi. Zidanın isə bunu istəyib-istəmədiyini bilmirəm”.
Qeyd edək ki, Zidanın sonuncu iş yeri 2021-ci ilin yayında ayrıldığı “Real” olub. 52 yaşlı mütəxəssis həmin vaxtdan bəri heç bir klubun təklifini qəbul etməyib. Deyilənə görə, o, yalnız Fransa yığmasını çalışdırmaq istəyir. Zidan hazırda Madriddə yaşayır və yalnız Fransa Futbol Federasiyasından təklif gözləyir.
Deşamın daha bir vacib açıqlaması Kilian Mbappe ilə bağlıdı. O, “Real”ın hücumçusunu yenidən yığmaya çağıracaq. Fransa martın 20-si və 23-də Millətlər Liqasının 1/4 final matçlarında Xorvatiya ilə qarşılaşacaq:
“Kilian martda heyətdə olacaq? Təbii ki, olacaq. Niyə də olmasın?!”
Xatırladaq ki, Mbappe ötən ilin oktyabr və noyabr aylarında Millətlər Liqasında keçirilən oyunlar üçün yığmaya çağrılmamışdı. Onda yerli mənbələrdə Deşamla aralarında problem yaşanan hücumçunun milli komandada oynamaq istəmədiyi haqda xəbərlər yayılmışdı.
Yeri gəlmişkən, 25 yaşlı hücumçu milli formada meydana çıxdığı 86 matçda 48 qol vurub və 35 məhsuldar ötürmə verib.
Digər xəbərlər
