“Real” – “Atletiko” oyununda meydan sahiblərinin qapısına təyin olunan şübhəli penalti İspaniyada gözlənilən reaksiyanı doğurub.

Həmişə olduğu kimi, “Real”ın klub telekanalı yenə də çox fəaldı. İdarəçiliyi tənqid edən həmkarlarımız xüsusən də 34-cü dəqiqədəki penaltini mikroskop altında gözdən keçirir. Xatırladaq ki, meydan sahiblərinin müdafiəçisi Orelyen Çuameni cərimə meydançasında “hindular”ın vingeri Samuel Linoya qarşı kobudluq etdiyinə görə referi Sesar Soto Qrado penalti nöqtəsini göstərib.

“Real” TV-nin efirində həmin epizoda reaksiya belə olub:

Xose Neqreyra İspaniya Kral Futbol Federasiyasının texniki hakimlər komitəsinin sabiq vitse-prezidentidi. İspaniya Prokurorluğu 2023-cü ilin fevralında Neqreyra ilə oğlunun nəzarət etdiyi şirkətlərin 2001-18-ci illər aralığında “Barselona”dan hakimliklə bağlı məsləhət xidmətinə görə 7,8 milyon avro aldığını müəyyənləşdirmişdi. Ötən il mayın 24-də Barselona Məhkəməsi həm klubun, həm də Neqreyranın üzərindən bütün ittihamları götürdü.

Bu arada Madrid derbisini idarə edən Sesar Soto Qrado ilə oyunun VAR hakimi Rikardo Benqoeçea arasında penalti epizodu zamanı gedən danışıqların mətni açıqlanıb.

VAR: bu hərəkəti o qədər də dəqiq çəkmək mümkün olmayıb, eşidirsiz?
Soto Qrado: eşidirəm. Ancaq Çuameni Linonun ayağına butsun “dişi” ilə basdı. Mənə daha bir rakurs verin. Bax gör, bu epizodu arxadan göstərən təkrar varmı?
VAR: əlimizdə olan ən yüksək keyfiyyətli kadr budu, Sesar. Qalan rakurslar çox qeyri-dəqiqdi.
Soto Qrado: onda mən penalti təyin edirəm. Yalnız penalti, futbolçuya vərəqə göstərmədən.

Girişdə vurğuladığımız kimi, “Real” TV hakimliklə bağlı məsələlərin müzakirəsində çox fəaldı. Klub telekanalı madridlilərin əleyhinə yönələn hakim qərarlarının statistikasını hazırlayıb. Belə ki, İspaniyada videotəkrar sistemi tətbiq olunandan bəri “Real”ın oyunlarında 109 dəfə VAR-ın müdaxiləsinə ehtiyac duyulub. VAR-ın qərarlarından 41-i bu komandanın lehinə, 68-i isə əleyhinə olub.

Klub telekanalı VAR qərarlarının “Real” üçün nisbətinin -27-yə bərabər olması üzərində xüsusi dayanıb. Ancaq “ağ şimşəklər”in əsas rəqibləri “Barselona” və “Atletiko”da belə qərarların balansı müsbətdi. Kataloniyalılarda +4, “hindular”da isə +9.