Cokoviçi Avstraliyada zəhərləyibmişlər!
Serbiyalı tennisçi Novak Cokoviç GQ jurnalına sensasiya sayıla biləcək açıqlamalar verib.
Onun dediyinə görə, 2022-ci ildə saxlanıldığı Avstraliyada qidadan zəhərlənib:
“Evə dönəndən sonra sağlıq durumumda problemlər başladı. Anladım ki, Melburndakı həmin oteldə mənə verilən yeməkdən zəhərlənmişəm. Sebiyaya qayıdandan sonra özüm üçün bəzi şeyləri kəşf etdim. Heç vaxt kiməsə bu haqda danışmamışam. Ancaq özüm üçün aydınlaşdırdım ki, orqanizmimdə ağır metal yüksək səviyyədədi. Məndə çox yüksək səviyyədə qurğuşun və civə var idi”.
Cokoviç əlavə edib ki, xəstəlik əvvəlcə qripə oxşayıb. Amma bu sadə qripdən bir neçə gün sonra elə yerə dəyib ki, “təcili yardım” briqadası tərəfindən evdə müalicə almalı olub. Belə hal bir neçə dəfə təkrarlandığından ulduz tennisçi toksikoloji testdən keçib.
Xatırladaq ki, Cokoviç 2022-ci ildə, yanvarın əvvəlində “Australian Open”də iştirak etmək üçün Melburna yollanıb. Lakin Avstraliyanın hakimiyyət orqanları onu məcburi peyvənddən tibbi səbəblərdən azad olmağa dair sənədlərində problemə görə saxlayıb, vizasını ləğv edib və karantinə göndərib.
Yanvarın 10-da Melburn məhkəməsi idmançının apellyasiya şikayətini təmin edib, onun azadlığa buraxılması və sənədlərinin qaytarılması barədə qərar verib. Lakin daha sonra immiqrasiya məsələləri üzrə nazir Aleks Hoik serb tennisçinin vizasını yenidən ləğv edib. Avstraliya Federal Məhkəməsi yanvarın 16-da Cokoviçin vizasının ləğvi ilə bağlı daha bir apellyasiya şikayətini rədd edib və onun ölkəni tərk etməli olduğuna dair qərar verib. Ertəsi, yəni yanvarın 17-də Novak Serbiyaya qayıdıb.
37 yaşlı serbiyalı Avstraliya Açıq Çempionatının onqat qalibidi. “Böyük dəbilqə” seriyasından olan ilk turnir – “Australian Open” bu il yanvarın 12-26-sı aralığında “Melburn-Park” idman kompleksinin kortlarında keçiriləcək. Novak da turnirə qatılacaq.
Digər xəbərlər
