Bu gün Misli premyer-liqasında qış fasiləsi başa çatacaq. Bununla da mövsümün əsas, yəni çempionun və avrokuboklara vəsiqə qazanacaq komandaların müəyyənləşəcəyi hissəsinə qədəm qoyacağıq.

Məlum olduğu kimi, 2024-cü ildəki son matç “Tofiq Bəhramov”da keçirildi və “Qarabağ” ən yaxın izləyicisi “Araz-Naxçıvan”ı məğlub etdi – 2:0. Elə yeni ilin, başqa cür adlandırsaq, “futbol ili”nin ikinci yarısının ilk matçı da həmin stadionda baş tutacaq. 19-cu turun ilk qarşılaşmasında “köhlən atlar” “Şamaxı”nı sınağa çəkəcək. Görüşü “CBC Sport” canlı yayınlayacaq. Turun qalan oyunları yanvarın 18-19-da keçiriləcək.

Misli premyer-liqası
3-cü dövrə, 19-cu tur
17 yanvar
Qarabağ – Şamaxı 3:2
Nəriman Axundzadə, 4. Aleksey Kaşuk, 29. Cəlal Hüseynov, 71 - öz qapısına. - Belajdi Pusi, 14. Brahim Konate, 39.
“Qarabağ”ın bu rəqiblə ev oyunlarının balansı: 37:+24=9-4, 71:19.
1999/2000 - 2:0; 2000/01 - 3:0; 2001/02 - 1:2; 2002/03 - 3:1; 2004/05 - 3:1; 2005/06 - 1:0; 2006/07 - 0:1; 2007/08 - 0:1; 2008/09 - 1:1; 2009/10 - 1:1, 1:1; 2010/11 - 1:0, 1:0; 2011/12 - 1:0, 1:0; 2012/13 - 0:0, 3:2; 2013/14 - 2:0, 4:1; 2014/15 - 0:0, 0:0; 2015/16 - 1:0, 2:0; 2016/17 - 0:0, 0:1; 2017/18 - 1:0, 1:1; 2018/19 - 5:1, 3:0; 2019/20 - 2:2; 2020/21 - 6:1, 2:0; 2021/22 - 1:0, 8:0; 2022/23 - 4:0, 3:1; 2024/25 – 3:0.
Cəzalı: yoxdu.
“Futbol+”in proqnozu: 50-20-30.
Bakı, Tofiq Bəhramov adına Respublika stadionu. Saat 19.00.

Artıq demək olar ki, hamının razılaşdığı fikir var: mövsümün sonunda “Qarabağ”ın çempionluğuna şahidlik edəcəyimizlə bağlı proqnoza mane olacaq hansısa komanda yoxdu. Və ilk 18 turda bunun əksini sübut edəcək ciddi dəlilə rast gəlmədik. Ağdamlıların ən yaxın izləyicisi olan “Araz-Naxçıvan”dan avrokuboka görə bir oyun az keçirməsi “qırmızı-ağlar”ın dəfələrlə lider olmasıyla nəticələndisə, oyun sayı bərabərləşəndən sonra “daşlar yerinə oturdu”.

Yuxarıda bəhs etdiyimiz kimi, həlledici görüşdə də qalib gələn “köhlən atlar” qış çempionu oldu. Hələ ki Qurban Qurbanovun komandasının hansı çətinliklərlə üzləşəcəyini bilmirik. O bəllidi ki, “Şamaxı” ilə matç “köhlən atlar” üçün heç də çətin keçməyəcək. Hər halda, “Qarabağ” “şirlər”ə sonuncu dəfə 2017/18 mövsümündə uduzub – 0:3. Həmin vaxt bu komanda hələ “Keşlə” adlanırdı.

Qısası, qonaqların imkansız görünən, amma mümkün qələbəsinə “sensasiya”dan başqa ad qoymaq olmaz. Ayxan Abbasovun komandasında yeni transferlər də çoxdu, gedənlər də. Ümumiyyətlə, “şirlər”in yenidən qurulduğunu iddia etsək, yanılmarıq. Görünür, ya danışılmış oyunlarla bağlı proses, ya da sonradan ortaya çıxan bəzi məsələlər “Şamaxı”nı ciddi dəyişikliklərə vadar edir. Bunun nə ilə nəticələnəcəyini zaman göstərəcək.

Beləliklə, qonaqların “Tofiq Bəhramov”dan azı “sülh”lə qayıtması üçün möcüzə lazımdı. Axı statistika da “şirlər”in əleyhinədi. Dəqiq desək, “Qarabağ” bu komanda ilə son 7 oyunda qələbə qazanıb. Üç görüşdü “Qarabağ”a qol vurmayan “Şamaxı” son 21 matçda qalib gələ bilməyib.

Ümumiyyətlə, bu komandalar indiyə qədər 76 dəfə qarşılaşıb. Bunların 39-da Ağdam, 13-də Şamaxı təmsilçisi üç xala yiyələnib, 24-də hərəyə bir xal düşüb. Topların nisbətində “köhlən atlar” öndədi – 111:44.

1. Qarabağ 19 16 2 1 50-9 50
2. Araz-Naxçıvan 18 12 3 3 21-13 39
3. Turan Tovuz 18 8 8 2 24-15 32
4. Zirə 18 9 3 6 28-16 30
5. Sabah 18 6 8 4 27-24 26
6. Sumqayıt 18 6 2 10 15-26 20
7. Şamaxı 19 4 5 10 18-26 17
8. Neftçi 18 3 8 7 16-27 17
9. Kəpəz 18 3 2 13 12-41 11
10. Səbail 18 2 3 13 16-30 9

Bombardirlər: Coy-Lens Mikels (Sabah), Felipe Santos (Araz-Naxçıvan) – 8, Davit Volkov (Zirə) – 7.

KƏNAN BAHADIR