Ötən ilin ən çox müzakirə edilən idmançılarından olan və Parisdə keçirilən Yay Olimpiya Oyunlarında atıcılıq yarışlarında gümüş medal qazanan türkiyəli Yusuf Dikeç maraqlı bir xəbərlə gündəmə gəlib.

''Football-plus.az'' xəbər verir ki, 52 yaşlı idmançı 10 metr məsafəyə pnevmatik tapançadan atış zamanı qulaqlıqdan, xüsusi eynəkdən istifadə etməməklə, eləcə də çox sakit, soyuqqanlı görüntüsü ilə medal qazanaraq sosial şəbəkələrin bəzəyinə çevrilmişdi.

Medal qazandıqdan sonrakı 24 saat ərzində təkcə ABŞ-da onun adı internetdə 200 min dəfə axtarışa verilmişdi. Fransanın ünlü ''Ekip'' nəşri isə əvvəllər Türkiyənin polis orqanlarında işləmiş Dikeç ilə bağlı diqqətçəkən bir iddia ortaya atıb. Nəşrin saytında bununla bağlı geniş bir məqalə dərc olunub.

Həmin məqalədə qeyd olunub ki, Yusufun vəkili Mehmet Əli Akgül müsahibə üçün fransızlardan 1 milyon lirə tələb edib! Bu məbləğ 27300 avroya bərabərdi. Bir müddət sonra Akgül fransızlara zəng vuraraq tələblərini yeniləyib. O yarım saatlıq müsahibə üçün ''Ekip''in əməkdaşlarından 30 min avro tələb edib. Bundan başqa Yusufun polis orqanları və şəxsi həyatı ilə bağlı suallara cavab verməyəcəyini bildirib.

Sualların tamamilə idman sahəsindən olmasını istəyən Akgül sonda müsahibənin hazır versiyasının çap olunmamışdan öncə onlara göndərilməsini də tələb edib. Nəhayət, o, məbləğin hamısının müsahibədən öncə hesablarına köçürülməsini də istəyib. Fransızlar bu tələblər qarşısında şoka düşərək Yusuf Dikeç və onun vəkilini tənqid ediblər.

Həmin məqalədə ''Yusufun sözü çox bahalı imiş'' və ''gümüş medalı qazandığı sadəlikdən indi çox uzaqdı'' ifadələrinə yer verilib.

ƏLİ