''Qalatasaray'' əla mövsüm keçirməsinə baxmayaraq komandada bəzi mövqelərin güclənməsinə ehtiyac var.

Qış transfer dönəmində xüsusilə hücum və müdafiə xəttinə yeni oyunçular alınacağı gözlənilir. Amma hələ ki, Türkiyə çempionu danışıqlar apardığı oyunçularla anlaşmaqda çətinlik çəkir. ''Roma''lı Paulo Dibalanın transferinin düyünə düşdüyünü xəbər vermişdik. İndi də ''Cim-Bom''un gündəmində olan daha 2 futbolçudan buna bənzər xəbərlər gəlib.

Bunlardan biri Corc Mikautadzedi. Mauro İkardinin ağır zədə alaraq mövsümü başa vurmasının ardından yaxşı bir hücumçuya ehtiyac duyan İstanbul nəhəngi diqqətini Gürcüstan yığmasının üzvünə yönəldib. Amma ''Qalatasaray''ın 17 milyon avroluq təklifi ''Lion'' tərəfindən dərhal geri çevrilib. Fransızlar 25 milyon avro tələb edirlər və üstəlik bu məbləğin böyük hissəsini nəğd istəyirlər.

Son AÇ-də öz oyunu ilə diqqət çəkən və Türkiyənin də qapısına yol tapan Mikautadze bu mövsüm ''Lion''da 21 rəsmi oyunda 7 qol, 1 məhsuldar ötürmə ilə fərqlənib. ''Qalatasaray''ın gündəmindəki digər futbolçu Con Arias üçün ''Fluminense'' ilə aparılan danışıqlar isə dayandırılıb. Məlum olub ki, 27 yaşlı futbolçunun haqlarının yarısı onun əvvəlki klubu ''Patriotas''a məxsusdu. Üstəlik ''Fluminense'' də Ariasın bütün haqlarını satmaq istəmir. ''Sarı-qırmızılar'' 10 milyon avro təklif ediblər və bu məbləğ qarşılığında Ariasın bütün haqlarına sahib çıxmaq istəyirlər.

Türkiyə çempionu qarşı tərəfə bu məbləğin artırılmayacağını deyib. 27 yaşlı futbolçu ''Fluminense''nin heyətində son mövsümdə 53 rəsmi oyuna çıxaraq 15 qol, 8 məhsuldar ötürmə ilə fərqlənib.

ƏLİ