“Çelsi”nin əfsanəsi Frenk Lempard İngiltərənin çempionşipində mübarizə aparan “Koventri Siti” ilə anlaşıb. 46 yaşlı mütəxəssis klubla 2,5 illik müqavilə bağlayıb. Lempard baş məşqçinin səlahiyyətlərini yerinə yetirdiyi “Çelsi”dən ayrılandan sonra növbəti dəfə klub işinə qayıdır.

“TalkSPORT”un xəbərinə görə, “Koventri”nin baş məşqçi postuna 2-ci namizəd Ruud van Nistelroy idi. “Mançester Yunayted”in sabiq baş məşqçi əvəzi bir çox klub rəhbərləri üçün prioritet variant olsa da, “Koventri”nin sahibi Daq Kinq Lempardın üzərində dayanıb. Ona görə ki, Harri Rednappın ailəsi ilə çox yaxındı. “Tottenhem”in sabiq baş məşqçisi Rednapp isə “Çelsi”nin əfsanəsinin dayısıdı.

Britaniyadan olan qaynaqlar həm də onu iddia edir ki, Van Nistelroyun agentlərini sonradan “Koventri” ilə danışıqlarda “əyləci basıb”. Belə hesab ediblər ki, niderlandlı daha sərfəli təklif ala bilər, məsələn, premyer-liqa klubundan. Bu məqam “Koventri” rəhbərliyinin Lempardın üzərində dayanmasını daha da qətiləşdirib.

“Koventi” noyabrın əvvəlində son 7 ildə komandaya rəhbərlik edən Mark Robinslə vidalaşıb. Azarkeşlər isə baş məşqçinin istefasını xoş qarşılamayıb və Daq Kinqi “tənqid atəşinə tutub”. “Koventi” Robinsin rəhbərliyi altında ötən mövsüm tarixində 2-ci dəfə İngiltərə kubokunda yarımfinala yüksəlib, bu mərhələdə isə MY-yə penalti seriyasında uduzub. Ondan bir il əvvəl komanda çempionşipdə 5-ci yeri tutub, premyer-liqaya vəsiqə uğrunda pley-offa qalıb, finalda “Luton”la bacarmayıb. Cari mövsümə gəlincə, “Koventi” 17-ci turdan sonra 17 xalla 17-ci pillədə qərarlaşıb və təhlükəli zonadan bir qədər yuxarıdadı.
Lempardın artıq çempionşipdə iş təcrübəsi var. İngiltərəli mütəxəssis 2018/19 mövsümündə “Derbi Kaunti”ni çalışdırıb. Onda komanda 6-cı yeri tutmaqla premyer-liqaya vəsiqə uğrunda yarışmaq imkanı qazanıb. “Derbi”nin elitaya yolunu “Aston Villa” kəsib (1:2).

Lempardın sonuncu iş yeri “Çelsi” olub. Frenk London klubunda 2022/23 mövsümünün sonuna qədər baş məşqçinin səlahiyyətlərini yerinə yetirib. 2019-21 aralığında da bu komandanın “sükanı arxasında” olub. 2022-nin yanvarından 2023-ün yanvarına kimi isə “Everton”a rəhbərlik edib.