Argentina çempionatının 19-cu turunda diqqəti ən çox cəlb edən fakt 14 oyundan 9-da qalibin müəyyənləşməməsi oldu. Başqa sözlə, mövsümün ən “sülhpərvər” turu reallaşdı. “Veles Sarsfild”, liderin əsas izləyiciləri “Atletiko Urakan” və “Talyeres de Kordoba” da rəqibləri ilə heç-heçəyə razılaşdı. Nəticədə bu komandalar arasındakı xal fərqi olduğu kimi qaldı.

12-ci turdan zirvədə olan “Veles Sarsfild” ardıcıl ikinci dəfə hesabına bir xal yaza bildi. Əvvəlki turun “River Pleyt” ilə səfər matçında 1:1 hesabı Qustavo Kinterosun komandası üçün qənaətbəxş nəticə sayılmışdı. Lakin paytaxt klubunun öz meydanında “Belqrano”dan maksimum xal ala bilməməsi itki sayılmalıdı. Bu mövsüm ortabab komanda təsiri bağışlayan “Belqrano” liderə ciddi müqavimət göstərdi. Hesabı da qonaqlar açdılar, özü də 5-ci dəqiqədə. “Veles”in ilk hissəni məğlub başa vurması da gözlənilməz oldu. Meydan sahibləri yalnız fasilədən sonra cavab qolunu vurdular: 20 yaşlı yarımmüdafiəçi Tyaqo Fernandesin 52-ci dəqiqədə hesabı bərabərləşdirməsindən sonra “Veles”in növbəti qolu vuraraq qələbə qazanacağını düşünənlər yanıldılar. Lider xal itkisinə baxmayaraq, mövqeyini qorudu.

Ona görə ki, tura liderdən 3 xal geri qalmaqla 2-ci yerdə başlayan“Atletiko Urakan” da iki xal itirdi. Frank Kudelkanın çalışdırdığı komanda “Sentral Kordoba” ilə ev oyununda çətinə düşdü. 60-cı dəqiqədə Matsanttinin qarşısında birbaşa qırmızı vərəqə görməsi həmin ana qədər qapıya yol tapa bilməyən “atletlər”in işini bir qədər də qəlizləşdirdi. Qolsuz “sülh” liderlə əsas izləyicisi arasındakı 3 xallıq fərqi qorudu.

“Talyeres de Kordoba” isə zirvə uğrunda mübarizədə ardıcıl üçüncü dəfə büdrədi. Kordobalılar evdə “Tiqre” ilə 1:1 hesabına razılaşdılar. Amma son 3 matçda yalnız 2 xal qazanmaq onların 3-cü yerdəki mövqeyinə təsir etmədi.

Tura hərəyə 28 xal toplamaqla, uyğun olaraq, 4-5-ci yerlərdə başlayan “İnstituto” ilə “Rasinq” də büdrədi. “Rosario Sentral”la qolsuz heç-heçə “İnstituto”nu 5-ci yerə saldı. “Banfild”ə uduzan (1:2) “Rasinq” isə bu pillədən 7-yə düşdü. Bu komandaların xal itkisindən maksimum yararlanan “Union” səfərdə “Ximnasiya” üzərində qələbə qazanmaqla 6-cı yerdən 4-ə yüksəldi.

Ölkənin son çempionunun vəziyyəti heç yaxşılaşmır. “River Pleyt” qeyri-sabit nəticələrdən heç cür qurtula bilmir. Marselo Qalyardonun komandası ardıcıl üçüncü dəfə rəqibi ilə “sülh”ə razılaşdı. “Defensa y Xustisiya” ilə səfər oyununun gedişində rəqib azlıqda qaldı. Lakin ölkə nəhəngi Palavesinonun 51-ci dəqiqədə növbəti xəbərdarlığa görə meydandan qovulmasından da yararlana bilmədi. Qolsuz heç-heçəyə nail olan Qalyardonun komandası 8-ci yerdən 9-a düşdü.

“Boka Xuniors”dakı vəziyyət əzəli rəqibindən çox da fərqlənmir. Fernando Qaqonun baş məşqçi vəzifəsindəki debütü əvvəlki turun “Tiqre” ilə oyununda fiasko ilə nəticələnmişdi – 0:3. Komandanın sabiq oyunçusu olan 38 yaşlı Qaqonun ikinci sınağı da qeyri-qənaətbəxş alındı. “Deportivo Riestra” ilə ev oyunu 1:1 hesabıyla nəticələndi. “Boka Xuniors” cədvəlin 16-cı pilləsində qaldı.

19-cu tur
Veles Sarsfild - Belqrano 1:1
T.Fernandes, 52 - N.Fernandes, 5.
Atletiko Urakan - Sentral Kordoba 0:0
Talyeres de Kordoba - Tiqre 1:1
Tarraqona, 52 – Forklas, 80.
İnstituto - Rosario Sentral 0:0
Banfild - Rasinq 2:1
Sepulveda, 53. İ.Rodriges, 70 – Kuyros, 49.
Ximnasiya - Union 2:3
De Blasis, 45+2-p. Kastilyo, 54 – Balboa, 4. Morales, 70. Domina, 90+6.
Defensa y Xustisiya - River Pleyt 0:0
Boka Xuniors - Deportivo Riestra 1:1
Kavani, 78 – B.Sançes, 15.
Barrakas Sentral - Estudiantes 1:1
Demartini, 90+4 – Kastilyo Manyoma, 76.
Nyuellz Old Boyz - Sarmyento 1:1
Silvetti, 29 – Morales, 21.
İndependyente - Qodoy Krus 1:1
Loyola, 61 – S.Rodriges, 87.
İndependyente Rivadaviya - San Lorenso 1:0
Ramis, 4.
Platense - Arxentinos Xuniors 2:1
Pelleqrino, 27-p. Maynero, 45+2 – Oros, 8.
Atletiko Tukuman - Lanus 1:0
Koronel, 26.

1. Veles Sarsfild 19 11 5 3 32-13 38
2. Atletiko Urakan 19 9 8 2 20-9 35
3. Talyeres de Kordoba 19 8 8 3 24-20 32
4. Union 19 8 6 5 21-18 30
5. İnstituto 19 8 5 6 25-17 29
6. Atletiko Tukuman 19 8 5 6 19-20 29
7. Rasinq 19 8 4 7 26-20 28
8. Deportivo Riestra 19 8 4 7 22-22 28
9. River Pleyt 19 6 9 4 21-13 27
10. Qodoy Krus 19 6 9 4 21-18 27
11. Estudiantes 19 7 6 6 22-20 27
12. Platense 19 7 6 6 17-16 27
13. İndependyente 19 5 11 3 16-13 26
14. Belqrano 19 6 8 5 22-21 26
15. Tiqre 19 6 7 6 25-23 25
16. Boka Xuniors 19 6 7 6 21-21 25
17. Rosario Sentral 19 6 6 7 22-19 24
18. Ximnasiya 19 6 6 7 19-19 24
19. Sentral Kordoba 19 6 5 8 22-26 23
20. İndependyente Rivadaviya 19 6 5 8 12-19 23
21. Arxentinos Xuniors 19 6 4 9 15-19 22
22. San Lorenso 19 5 6 8 15-18 21
23. Banfild 19 5 6 8 18-23 21
24. Nyuellz Old Boyz 19 5 6 8 13-22 21
25. Sarmyento 19 4 8 7 15-20 20
26. Lanus 19 4 8 7 19-27 20
27. Defensa y Xustisiya 19 3 7 9 15-28 16
28. Barrakas Sentral 19 2 7 10 9-24 13

Bombardirlər: B.Romero (Veles Sarsfild) – 11, X.Errera (Deportivo Riestra) – 9, Borxa (River Pleyt), M.Ximenes (Boka Xuniors), Pelleqrino (Platense) – 8.