Onsuz da Bakı metrosunda həmişə sıxlıq olur. Sərnişinlər, adətən, ya səssiz-səmirsiz düşəcəyi ünvanı gözləyir, ya da mobil telefonlar vasitəsilə “vaxt öldürür”.

Cümə axşamı saat 18.00 radələrində isə durum bir qədər fərqli idi. Sıxlıq öz yerində, amma bu dəfə insanların əksəriyyəti “Qarabağ” formasını geymişdi, dost-tanışla birgə “Ayaks”la matçın müzakirəsini aparır, həm oyuna, həm də Mərdan Kazımovun iştirakıyla keçiriləcək konsertə tələsirdi. Təbii ki, bu sırada mən də var idim. Düzdü, insanların futbol sevgisi, xüsusilə “Qarabağ”a rəğbəti, “Ayaks”ı məğlub edəcəyini düşünənlərin çoxluğu məni xeyli sevindirdi. Amma kefimə soğan doğrayan hala da şahidlik etdim.

Ona görə ki, metronun “Gənclik” stansiyasının çıxışında real qiyməti 5 manat olan biletlərin əhaliyə baha təklif edildiyini gördüm. Hətta bir qrup şəxsin söhbətini eşidəndə məlum oldu ki, hüquq-mühafizə orqanları nə az, nə çox - 12 nəfəri bu üzdən saxlayıb. “Qarabağ” biletlərin “qara bazar”a çıxmasının qarşısını almaq üçün nə vaxt ciddi tədbir görəcək” deyə düşünürdüm ki, stadion ərazisindən Mərdan Kazımovun səsi ucaldı: “Göy və ağ, bizim rənglər! Qələbə bizi səslər!”

Konsert bitəndən sonra jurnalistlər üçün ayrılan media sektoruna yollandım. Bir qədər sonra komandalar meydana çıxdı. Avropa Liqasının himni səslənərkən “İmarət Tayfa” “Ruhlar şəhərindən Avropaya”, “Qarabağ Ordu” isə “İnanırıq ki, ağ və göy üçün döyüşəcəyik” sözlərinin ingilis dilində yazıldığı xoreoqrafiyalar açdı. Qeyd etmək yerinə düşər ki, “İmarət Tayfa”nın xoreoqrafiyasında həm də Ağdamda yerləşən, ermənilərin dağıtdığı Cümə məscidi də əks olunmuşdu. Azarkeşlərin əziyyət çəkdiyi, xüsusi hazırlıq işləri gördüyü hiss olunurdu. Mövzunun xoşagəlməz tərəfi odu ki, Amsterdamdan Bakıya gələn 500 niderlandlı azarkeş bizimkilərdən fərqli əvvəldən sona qədər susmadı: bəstələr oxudular, şüarlar səsləndirdilər, yeri gələndə yalnız qışqırdılar. Stadiondakı 27 mindən çox azərbaycanlı isə nadir hallarda varlığını hiss etdirdi. Bu üzdən azarkeşlərinin güclü dəstəyini tirajlayan, komandalarının qələbəsiylə yanaşı, tribunada da üstün olduqlarını yazan Niderland mətbuatına haqq verməmək olmur!

Amma bu o demək deyil ki, “Qarabağ” tam dəstəksiz qalmışdı. “İmarət Tayfa” “Ayaks”ın hesabı açmasından dərhal sonra “UEFA mafiya” şüarları səsləndirdi. Bu o deməkdi ki, “Qarabağ” yenə “İdman tədbirinə uyğun olmayan mesajın ötürülməsi” maddəsiylə 6000 avro cərimələnəcək. Bəs görəsən, oyunu izləmək üçün “Tofiq Bəhramov”a gələn Rəşad Sadıqovun yüngül qəza keçirən avtomobili onu nə qədər ziyana salıb? Beləcə “Qarabağ”ın növbəti məğlubiyyətinə şahidlik etdik. “Ayaks” qələbəni qeyd etmək üçün azarkeşlərinə yaxınlaşdı. “Köhlən atlar” isə həm “İmarət Tayfa”ya, həm də “Qarabağ Ordu”ya təşəkkür edərək paltardəyişmə otağına yollandı. Nə forma istəyən azarkeşlərə məhəl qoydular, nə də jurnalistlərin suallarını cavabladılar...

ƏSƏD SEYİDOV