Bu qrupda əsas diqqətlər Münhenə yönəlmişdi.

Dünya futbolunun iki nəhənginin dueli məhsuldar alınmasa da, oyunun maraqsız keçdiyini söyləmək olmaz. Heyətlə bağlı problemlərə baxmayaraq, Yulian Naqelsmannın komandası çox yaxşı performans sərgilədi. Naqelsmann bu dəfə “Hoffenhaym”ın təcrübəli qapıçısı Baumann ilə “Ştutqart”lı Levelinqə debüt imkanı yaratdı. Onların hər ikisi yaxşı təsir bağışladı. Levelinq artıq 2-ci dəqiqədə hesabı açsa da, işə VAR qarışdı. Hücumun əvvəlində qəribə ofsayd qeydə alındı. Çünki ofsaydda olan Qnabri aktiv vəziyyətə gələnə qədər qonaqların iki üzvü topa toxunmağa macal tapmışdı. Bundestim ilk yarını qapıya zərbələr baxımından 8:0 öndə tamamladı! “Narıncılar”ın ilk hissəni qapıya zərbə vurmadan tamamlamasına sonuncu dəfə 2019-un iyununda Portuqaliyaya qarşı oyunda rast gəlinmişdi. Ronald Kuman fasilədə iki dəyişikliyə əl atdı və bunun sayəsində qonaqlar bir qədər nəfəs almağa başladılar. Hətta komanda tədricən üstünlüyü də ələ aldı. Amma qəribədi ki, qolu meydan sahibləri vurdu. Künc zərbəsindən sonra yaranan qarışıqlıq zamanı top Levelinqin önündə düşdü. 23 yaşlı vinger isə qüvvətli zərbə ilə topu yaxın yuxarı küncə “sancdı”. Bu qolun artıq qeydə alınmaması mümkün deyildi.

Qoldan sonra Almaniya praqmatik oynayaraq özünə lazım olan nəticəni qoruya bildi. Qonaqların son anlarda iki yaxşı fürsəti oldu. Əvvəlcə Simonsun zərbəsindən sonra top tirə tuş gəldisə, Malenin zərbəsi zamanı Baumann inamlı oynadı. Beləliklə, bundestim bu nəticədən sonra qrupu ilk iki pillədə bitirməyi rəsmiləşdirdi. Yəni komanda tarixində ilk dəfə ML-də pley-offa yüksəldi. Niderlandın isə işi çətinləşdi. Çünki Macarıstan səfərdə Bosniya və Hersoqovina üzərində inamlı qələbə qazanmaqla xal hesabında Niderlanda çatdı. Ona görə də bu komandaların gələn ay keçiriləcək oyununu səbirsizliklə gözləməyə dəyər.

A liqası, 3-cü qrup
Almaniya – Niderland 1:0 (0:0)
Almaniya: Baumann, Kimmix, Rüdiger, Şlotterbek, Mittelştadt, Ştiller (Anton, 82), Pavloviç (Şade, 77), Qnabri, Virts (Andrix, 46), Levelinq (Qosens, 87), Klayndinst (Burkardt, 82).
Niderland: Verbrüggen, Dyumfris, De Vrey, Van De Ven, Hato, Qravenberx (Qeertruyda, 80), K.Timber (Viffer, 46), Simons, Reynders (Malen, 46), Qakpo (Frimponq, 65), Brobbi (Zirkzee, 65).
Qol: Levelinq, 64.
Vərəqələr: Reynders, 30. Rüdiger, 63. Viffer, 63. Anton, 90+3. Simons, 90+3. Şlotterbek, 90+3 – sarı.
Hakim: Slavko Vinçiç (Sloveniya).
14 oktyabr. Münhen. 68367 tamaşaçı.

Bosniya və Hersoqovina – Macarıstan 0:2 (0:1)
Bosniya və Hersoqovina: Vasil, Qazibeqoviç (Omeroviç, 46), Katiç, Biçakçiç, Kolaşinats, Tahiroviç (Şariç, 79), Qiqoviç (Huseynbaşiç, 64), Bayraktareviç, Burniç (Tabakoviç, 64), Hayradinoviç (Başiç, 79), Ceko.
Macarıstan: Dibuş, Bolla (Gera, 68), Botka, Orban, Fiola, J.Nad (Suç, 86), Nikitşer, Şafer (A.Nad, 86), Şallai (Qazdaq, 68), Soboslai, Varqa (Adam, 78).
Qollar: Soboslai, 38 (0:1). Soboslai, 50-p. (0:2).
Vərəqələr: Katiç, 24. Kolaşinats, 60. Huseynbaşiç, 74. Fiola, 87 – sarı.
Hakim: Entoni Teylor (İngiltərə).
14 oktyabr. Zenitsa. 8329 tamaşaçı.

1. Almaniya 4 3 1 0 10-3 10
2. Niderland 4 1 2 1 8-6 5
3. Macarıstan 4 1 2 1 3-6 5
4. Bosniya və Hersoqovina 4 0 1 3 3-9 1
16 noyabr: Niderland – Macarıstan, Almaniya – Bosniya və Hersoqovina.

Faktlar
* Almaniya Naqelsmannın başçılığı altında 17-ci oyunda 10-cu qələbəsini qazandı (4 heç-heçə, 3 məğlubiyyət).
* Qapıçı Baumann 34 yaş 131 günlüyündə Almaniya yığmasında ilk oyununu keçirdi. O, İkinci Dünya Müharibəsindən bəri bundestimin ən yaşlı ikinci debütantı kimi tarixə düşdü! 1959-un mayında Polşa ilə yoldaşlıq oyununda Mattias Maurits almanların heyətində 34 yaş 188 günlüyündə debüt etmişdi.
* Levelinq Naqelsmannın dönəmində yığmada debüt oyununda fərqlənməyi bacaran ilk futbolçu oldu. Bundestimin heyətində sonuncu dəfə bu sevinci 2022-ci ildə Niklas Füllkruq yaşamışdı.

Oyundan sonra
Yulian Naqelsmann, Almaniya yığmasının baş məşqçisi: