"Qarabağ" Misli premyer-liqasının 10-cu turunda "Kəpəz"i məğlub etdi - 5:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov matçdan sonra keçirilən mətbuat konfransında jurnalistlərin suallarını cavabladı.

- Yığmamız Millətlər Liqasında ardıcıl məğlubiyyətlər yaşadı. "Qarabağ"ın millimizdə çıxış edən futbolçuları həmin oyunların təsirindən çıxıb?
- Məncə, normal idilər. Düşərgəyə qayıdanda üzgün idilər. Toparlanıblar, amma milli səviyyəsində məğlubiyyətlər yaddan çıxmır. Ümid edirəm ki, yığmamız növbəti matçlarda daha yaxşı nəticələr əldə edəcək. Sevinirəm ki, futbolçularım bu matçı zədəsiz başa vurdu.

- Bəzən hərəkət etməmək də məsuliyyət yaradır. AFFA İcraiyyə Komitəsinin üzvüsüz. Millimizin məğlubiyyətlərini sizin də passivinizə yazmaq olar?
- Bu günlərdə belə mövzuları az müzakirə etsək, daha yaxşıdı. Hamımız üzgünük. Bəlkə də bəzi matçlarda məğlub olmaya bilərdik. Sadəcə, yığmamız fürsətlərdən yararlana bilmədi. Bu durumdan çıxmaq lazımdı. Fernando Santuş çox təcrübəli məqşçidi. İnanıram ki, psixoloji cəhətdən futbolçulara düzgün yanaşacaq. Millimizin yanında olmalıyıq. Qarşıdakı matçlara daha istəkli və sakit hazırlaşmaq lazımdı.

- Nəriman Axundzadə və Musa Qurbanlının məhsuldarlığı azdı. Bunun səbəbi nədi?
- Onlar əsas heyət oyunçusu deyil. Mövqe mübarizələrində uduzurlar. Nəriman pis təsir bağışlamır. Tez-tez qol və ya məhsuldar ötürməylə yadda qalır. Musa uzun fasilədən sonra ikinci oyununu keçirdi. Daha yaxşısını etmələri üçün meydanda daha çox vaxt keçirməlidilər.

- Musanı icarəyə vermək haqda düşünürsüzmü?
- Yerli  oyunçulara şans verməyə çalışırıq. Qarşıda hələ xeyli oyun var. Avrokuboklar, premyer-liqa... Ölkə kubokunda yarışacağıq. Kimisə icarəyə versək, oyunçusuz qala bilərik.

- İlqar Qurbanov "Sabaha saxlamayaq" verilişində vaxtilə futbolçuların milliyə sifarişlə qəbul olunduğunu dedi. Siz də millimizi çalışdırmısız. Dövrünüzdə belə hal yaşanıb?
- Məni düzgün başa düşün. Qeyri-ciddi fikirlərə önəm vermirəm. Bu danışıqlar sovetin vaxtında da var idi. Belə şeyin şahidi olmamışam. Bu fikirlər insanları futboldan uzaqlaşdırır. Baş məşqçi mənəmsə, nəticənin məsuliyyəti mənim üzərimdədisə, kim sifariş edə bilər ki? Verilişə  baxmamışam. İlqarı görəndə soruşaram. Bəlkə kimlərin sifarişlə çağırıldığını mənə deyər.

- Benzyanın oynamaması "Ayaks"la oyuna daha yaxşı hazırlaşması üçün idi, yoxsa millidən yorğun qayıtmışdı?
- "Ayaks"la oyun barədə düşünmürdük. Meydana hazır futbolçuları buraxdıq. Benzyanı əvvəldən meydana buraxıb risk almaq istəmədik. "Ayaks"la oyuna bir neçə gün vaxt var. Heyətlə bağlı qərar futbolçuların son durumuna əsasən veriləcək.

KƏNAN BAHADIR