Karvaxal ağır zədə aldı və... müqaviləsi yeniləndi
Son illərdə zədə üzündən dəfələrlə əsas oyunçularını itirən “Real” yenə zədə xəbəri ilə sarsılıb.
La Liqanın son turunda “Vilyarreal”la qarşılaşmanın son anlarında Yeremi Pino ilə mübarizədə yerə yıxılan və ağrıdan qıvrılan Daniel Karvaxalın mövsümü başa vurduğu məlum olub. Belə ki, təcrübəli ispaniyalı müdafiəçinin dizinin çarpaz bağları qopub. Karvaxal sosial şəbəkədəki səhifəsində paylaşım edərək bunları yazıb:
“Çarpaz bağlarımda ciddi bir zədə olması təsdiqini tapdı. Təcili əməliyyata ehtiyacım var və bir neçə ay oynaya bilməyəcəm. Müalicə dönəminə başlamaq və bir canavar kimi geri dönmək üçün indidən səbirsizlənirəm. Dəstək mesajlarınız üçün təşəkkür edirəm”.
Bu paylaşımın ardından “Real” da rəsmi açıqlama ilə Karvaxalın durumunun ciddi olduğunu və onun təxminən 8-10 ay yaşıl meydanlara həsrət qalacağını ictimaiyyətə çatdırdı. Hətta İspaniyanın ünlü “Marka” nəşri FİFA-nın mərkəzində baş həkim kimi çalışan Pedro Luis Ripola istinadla Karvaxalın bir ildən tez topa toxuna bilməyəcəyini iddia etdi. Maraqlıdı ki, futbolçunun zədəsinə aydınlıq gələndən dərhal sonra “Real” rəhbərliyi ona jest etmək qərarına gəldi. Karvaxalın müqavilə müddəti 2025-dən 2026-ya qədər yeniləndi! Madrid nəhənginin bir çox üzvləri Karvaxala dəstək paylaşımları ediblər. Hətta “Barselona”nın baş məşqçisi Hans-Diter Flik də son açıqlamasında “bütün “Barselona” camiəsi adından Karvaxala tezliklə sağalmağı və meydanlara dönməyi arzulayıram” açıqlamasını verib. “Real”ın öz yetirməsi olan 32 yaşlı futbolçu indiyə qədər bu klubda 427 qarşılaşmada forma geyərək 14 qol, 65 məhsuldar ötürmə ilə fərqlənib və 26 titul qazanıb. Klub tarixində o, titul sayına görə yalnız Luka Modriçdən (27) geri qalır. Qeyd edək ki, ötən mövsüm “Real” eyni zədə üzündən Tibo Kurtua, Eder Militao və David Alaba kimi önəmli futbolçuların xidmətindən uzun müddət məhrum olmuşdu. Kurtua ilə Militao artıq geri dönübsə, Alaba hələ də zədəsini müalicə etməklə məşğuldu.
Karvaxalın zədələnməsi Avropa futbolunda sıx təqvim məsələsini yenidən gündəmə gətirib. Çünki “Mançester Siti”li Rodri, “Barselona”lı Mark Andre Ter-Ştegen və “Yuventus”lu Bremer də bir müddət öncə çarpaz bağın zədəsi üzündən uzun müddətə sıradan çıxmışdı. Çoxlarının fikrincə, bu zədələrin səbəbi məhz təqvimin həddən artıq sıx olmasıdı. Rodri zədələnmədən öncə hətta bəzi oyunları boykot edə biləcəklərini dilə gətirmişdi. “Mançester Siti”nin digər üzvlərindən Kevin de Bruyne “FİFA və UEFA oyunçuları düşünmür. Onları yalnız pul maraqlandırır” açıqlamasını vermişdisə, Manuel Akanci “bu gedişlə 30 yaşımda karyeramı bitirəcəm” ifadəsini işlətmişdi.
Digər xəbərlər
