7-ci tur “Turan Tovuz” üçün uğurlu keçmədi. Tovuzlular “doğma divarlar” arasında “Araz-Naxçıvan”a uduzmaqla lider olmaq şansını əldən verdi.

Düzü, bunu meydan sahiblərinin zəif oyunuyla əlaqələndirmək mümkündü. Lakin futbol ictimaiyyətinin əksəriyyəti, xüsusilə tovuzlu azarkeşlər belə düşünmür. Ümumi fikir bəllidi: Ramon Maçado Redorik Millerin üzünə endirdiyi ayaq zərbəsinə görə qırmızı vərəqə alıb meydandan qovulsaydı, üç xal itirilməyəcəkdi. Deməli, günah Elçin Məsiyevdədi.

Tovuz camiəsini qəzəbləndirən başqa məsələ elə həmin Millerin “Sabah”la oyunda vurduğu qolun sayılmamasıydı. Göründüyü kimi, mövsüm başlayandan ən çox müzakirə doğuran iki epizod qeydə alınıb ki, bunlar məhz “Turan Tovuz”la bağlıdı. Bu üzdən çoxu “bozqurd”a münasibətdə qərəzli qərarlar verildiyini, qəsdən liderlikdən məhrum edildiyini düşünür. Hətta Hakimlər Komitəsinin sədri Frank de Blekerenin izahatları da tovuzlu tərəfdarları qane etmir.
Əslində məsələyə fərqli yanaşmaq lazımdı. Görünür, AFFA narazılıqlarla barışmır və rəsmi açıqlamalarla duruma aydınlıq gətirir. Bu, qurumun hadisələrə ciddi nəzarət etməsinin və ictimai rəyə önəm verməsinin sübutudu.

O başqa məsələ ki, tənqidlərin davamı, hansısa qərəzin olduğuna inam komandaya, baş məşqçi Kurban Berdıyevə və rəhbərliyə, xüsusilə Ehtiram Quliyevə təsirsiz ötüşməyə bilər. Qısası, azarkeşlər bütün məqamlara diqqətlə yanaşmalıdı. Hələ ki “Turan Tovuz”a qarşı hansısa qərəz hiss olunmur və bunun üçün səbəb də yoxdu. “Bozqurdlar” bütünlüklə çempionata köklənməli və hədəflərinə doğru irəliləməlidi. Fərqli düşüncələrə qapılmaq ruh düşkünlüyündən başqa nəyəsə səbəb olmayacaq. “Sabah”la matçda təmiz qolun sayılmadığına inanan futbolçular “Araz-Naxçıvan”a qarşı baxımsız və zəif çıxış etdisə, “qırmızı-ağlar”la qarşılaşmada rəqibin qırmızı vərəqə almalı olduğuna inananlar 8-ci turda “Şamaxı”ya qarşı daha pis oynadı.

Odu ki, tovuzlular komanda ətrafında sağlam ab-hava yaratmalıdılar. Belədə mütləq nəticə də gələcək.

KƏNAN BAHADIR