Cənubi Amerika Futbol Konfederasiyası (KONMEBOL) çoxdan gözlənilən qərarı verib. Uruqvay yığmasının bir neçə oyunçusu cəzadan qaça bilməyib.

Xatırladaq ki, bu il ABŞ-də keçirilən Amerika Kubokunda futbolçularla fanatlar arasında dava düşmüşdü. İnsident yarımfinalın iyulun 11-də baş tutan Uruqvay – Kolumbiya oyununda (0:1) baş vermişdi. Qəribə haldı ki, polislərlə stüardlar sərxoş kolumbiyalı azarkeşlərin uruqvaylı futbolçuların ailə üzvlərinin olduğu sektora yaxınlaşmasına imkan vermişdilər. Kolumbiyalıların əvvəlcə uruqvaylı kişiləri təxribata çəkdikləri, qadın və uşaqların ünvanına təhqiramiz söz və ifadələr işlətdikləri deyilirdi. Bu səbəbdən matçdan sonra uruqvaylı hücumçu Darvin Nunyes ilə onun bəzi oyundaşları yaxınlarının müdafiəsinə qalxaraq birbaşa tribunaya çıxmış və fanatlarla əlbəyaxa olmuşdular.

KONMEBOL-un Nizam-İntizam Komitəsi Nunyes, Rodriqo Bentankur, Matias Olivera, Ronaldo Arauxo və Xose Ximenesə biroyunluq cəza kəsib. Uruqvaylı futbolçular DÇ-2026-nın sentyabrın 7-nə təyin olunan Paraqvay ilə seçmə oyununda meydana çıxa bilməyəcəklər.