Artıq Amerika Kuboku-2024 (AK) tarixə qovuşub.

Maraqlıdı ki, hətta final ərəfəsində də ABŞ-yə ünvanlanan irad və tənqidlər səngiməmişdi. Nöqsanlarla dolu olan təşkilatçılığın qitənin ən qüdrətli dövlətinə yaraşmadığını çoxları deyir. Halbuki Şimali Amerika ölkəsində bu planda ciddi problemlərin olmayacağı ehtimal edilirdi.

Məşqçilər məmurlardan narazılıq etdilər
3-cü yer uğrunda keçirilən Kanada – Uruqvay matçından sonra baş məqşçilərin açıqlamaları diqqətdən yayına bilməzdi. Yox, diqqəti cəlb edən heç də onların oyunla bağlı fikirləri deyildi. Uruqvay yığmasını çalışdıran Marselo Byelsa AK-nın təşkilatçılarını və KONMEBOL-un məmurlarını “yalançı” adlandırıb:

Kanadalıların amerikalı çalışdırıcısı Cessi Marş isə ABŞ yığmasının başına keçmək haqda düşünmədiyini deyib. Mübarizəni qrupda dayandıran ev sahiblərinin baş məşqçisi Qreqq Berhalteri istefaya göndərən yerli məmurlar Marşdan, necə deyəllər, yağlı sillə alıblar. 50 yaşlı mütəxəssis milli komandanı məhz hazırkı futbol başbilənlərinə görə qəbul etməyəcəyini deyib.
Göründüyü kimi, iki məşqçi ABŞ-nin futbol təsərrüfatında problemlərin olduğunu açıq şəkildə dilə gətirib. Bu böyük ölkədə təhlükəsizliklə bağlı problem də var. Çox da uzağa getmək lazım deyil. Prezidentliyə namizəd olan Donald Trampa atəş açılıb. Əlbəttə, bu, iyulun bir nömrəli xəbəridi. Təhlükəsizlik problemi futbolda da var. Fakt budu ki, AK-nın izləyiciləri turnir zamanı özlərini bəzən, belə desək, ikinci sort adam kimi hiss ediblər. Bu isə dəhşətdi...

Futbolçularla fanatlar əlbəyaxa oldular
İki ildən sonra dünya çempionatını təşkil edəcək üç ölkədən biri məhz ABŞ olacaq (digər ikisi Kanada və Meksikadı). Bu ölkəyə çılğınlıqda cənubi amerikalılardan heç də geri qalmayan avropalı fanatlar da gələcəklər. 68 yaşlı Byelsa mövcud vəziyyətin çətinliyinə də işarə vurub. Cənubi Amerikada futbolun inkişafı ilə bağlı tənqidi fikir söyləyən ortaya çıxırsa, onu dərhal işdən azad edirlər. Bu regionda çoxları belə vəziyyətə düşməkdən qorxurlar, buna görə susurlar. Sözün düzü, AK-da əvvəllər də təhlükəsizlik problemi olub. Amma ABŞ-də yaşanan hadisə bu ölkənin imicinə qətiyyən xeyir gətirə bilməz.

Ən pisi odu ki, bu dəfəki turnirdə futbolçularla fanatlar arasında əməlli-başlı dava düşüb. İnsident yarımfinalın Uruqvay – Kolumbiya oyununda (0:1) baş verib. Ortaya təbii sual çıxır: polislərlə stüardlar sərxoş kolumbiyalı azarkeşlərin uruqvaylı futbolçuların ailə üzvlərinin olduğu sektora yaxınlaşmasına necə imkan verə bilirlər? Kolumbiyalıların əvvəlcə uruqvaylı kişiləri təxribata çəkdikləri, qadın və uşaqların ünvanına təhqiramiz söz və ifadələr işlətdikləri deyilir. Bu səbəbdən matçdan sonra uruqvaylı hücumçu Darvin Nunyes ilə onun bəzi oyundaşları yaxınlarının müdafiəsinə qalxaraq birbaşa tribunaya çıxıb və fanatlarla əlbəyaxa olublar. Adamı şoka salan digər fakt isə polislərin belə vəziyyətə böyük ölçüdə biganə qalmasıdı! Bəli, asayiş qoruyucularının işinə laqeyd yanaşması üzündən, necə deyərlər, ara qarışıb, məzhəb itib. Nəticə budu ki, Nunyes ilə bəzi oyundaşlarını müəyyən cəzalar gözləyir: KONMEBOL-un müvafiq komitəsi ağlagəlməz insidentlə bağlı təhqiqat aparır. Deyilənə görə, davada iştirak edən fanatlardan biri katolik kilsəsinin rahibidi. Həmin din xadimi Darvinin başına yumruğu ilə zərbə endirib.

Skaloni AK-da niyə şikayətlənə bilmir?
Təşkilatçılıqdan argentinalılar da narazıdılar. Bəlkə də inanmayacaqsız, amma Lionel Messi ilə oyundaşlarının ölümlə göz-gözə qaldığı da faktdı! Argentina yığması bir neçə il əvvəl köhnə təyyarə icarəyə götürübmüş. İstifadədən üç həftə sonra həmin təyyarədə olan “Şapekoense”nin (Braziliya) qəzaya uğradığı hamıya bəllidi... Yerli futbol qurumunun rəhbəri Klaudio Tapya pula bu şəkildə qənaət etməyi lazım bilir. Onun prezident postunda özünü diktator kimi aparması çoxlarına məlumdu. Bu səbəbdəndi ki, baş məqşçi Lionel Skaloni AK-da qazonların vəziyyətindən şikayətlənə bilmir. Bu, ona qadağan edilib. Görünür, Tapya KONMEBOL ilə münasibətlərin korlanmasını istəmir. Amma Byelsa Argentinada işləmədiyi üçün danışmaqda sərbəstdi.
ABŞ bir ildən sonra daha bir böyük turnirə evsahibliyi edəcək: Klublararası Dünya Çempionatı yeni formatda ilk dəfə bu ölkədə keçiriləcək. 32 klubun iştirakı ilə baş tutmalı olan turnir təxminən bir ayı əhatə edəcək. ABŞ 2026-cı ildə isə tarixdə ilk dəfə 48 yığmanın iştirak edəcəyi dünya çempionatına səhnə olacaq. Maraqlıdı, 16 komandalı AK-nın təşkilatçılığında ciddi nöqsanlara yol verən amerikalılar qonşuları kanadalılar və meksikalılarla birgə DÇ-2026-nı hansı səviyyədə təşkil edəcəklər? Üç ölkənin 16 stadionunda hansı vəziyyət yaşanacaq? 104 oyunun keçiriləcəyi qazonlar indiki kimi yarıtmaz olacaq?